என்னை நனைத்த மழைத்துளிகள்

தேங்கிய நீரை
வாரியிறைத்தபடிதான்
வாகனங்கள் நகர்கின்றன
இருந்தும் குறைவதாயில்லை
மழைநீர்க் குட்டை!

சவ ஊர்வலம்போலதான்
போக்குவரத்து ஊர்ந்து செல்லும்
ஊர்வலத்தின் முன்னே
உண்மையிலேயே
செத்துக்கிடந்தாலும் கிடக்கும்
எதாவது அரசு பேருந்து!

தேரைகள், பாம்புகள், எல்லாமே
சொல்லாமல் கொள்ளாமல்
வந்து குடியேறும்
கண்ணுக்கு அகப்படாத மூலைகளில்...
வாடகை பயம் போல!