கரிசல்குளத்தானின் வயக்காடு!

தரை வீழ்ந்த இலை

2012-02-07T05:17:00.000-08:00

ஒரு காலத்தில்
பச்சையம் நிறைந்து
பளபளப்பாய் இருந்திருக்கும்...
கிளை தாங்கிய பறவைக்கு
குடைதாங்கி
களைப்பாற்றி இருந்திருக்கும்...
எச்சங்கள் கூட சுமந்திருக்கும்...
காற்றின் கரம் பற்றி
விண்ணை எட்டிப் பிடிக்கவும்
முயன்றிருக்கும்...
கலகலத்து கதைபேசி
களிப்போடு மகிழ்ந்திருக்கும்...
இப்போது பச்சையம்
பழுதாகி, பழையதாகி,
இத்தனை காலமாய்
பிடித்திருந்த கிளை
பிடிக்காமல் கை விரிக்க
பிடி நழுவி, நழுவி
தரை வீழ்ந்த இலை
இன்றோ நாளையோ
அப்புறப்படுத்தப்படலாம்...
அத்தனை காலமாய்
கதை பேசிக் கலகலத்த
ஏதோ ஒரு
காற்றலையின் கரம் பற்றி!

இலையுதிர்க்காலம்...

2012-02-06T04:37:00.000-08:00

இலையுதிர்க்கால இரவில்
எலும்பும் தோலுமாய்
நிலவு!
*****
இலையுதிர் காலத்திலும்
உதிராத சருகுகள்
பறவையின் கூட்டில்!
*****

இலையுதிர்க்கால முடிவில்
பொறிக்ககூடும் இலைகள்...
அடைகாத்தபடி மரம்!
*****

விருந்தினரில்லாத
வீடாகிப் போனது
இலையுதிர்க்கால மரம்!

உன்னோடு நிமிடங்கள்...

2012-02-06T04:34:00.000-08:00

உன்னோடு பேசிக்கொண்டிருந்த
நிமிடங்களை
சுற்றிச் சுற்றி வருகிறது
கடிகாரம்!

இப்போது கேட்கும்
இந்த விமானச்சத்தம்
அப்போது எட்டவில்லை
என் செவிகளை!

நாம் அமர்ந்த இடத்தில்
இப்போது
வேறு யாரேனும்
அமர்ந்திருப்பார்கள்...
அவர்களாவது ரசிக்கட்டும்
அங்கு மலர்ந்த பூக்களை!

இன்றும்
நானே அதிகம் பேசினேன்
அதிகமாக சிரித்தேன்
எனோ
மவுனம் சுமக்கமுடியவில்லை...
ரசிப்பது நீயெனும்போது!

ஒளிந்து விளையாடிய
சிறுவர்களில் சிலர்
நம் பின்னாலும்
மறைந்திருந்து பிடிபட்டனர்...
இன்னமும் பிடிபடவில்லை
நம்முள் மறைந்துள்ள நாம்!

தந்தையாகிறேன்...

2012-01-20T05:31:00.000-08:00

தந்தையின்
திடீர் மரணச் செய்தியை சுமந்தபடி
அவசர ரயில் பயணம்;
நான் ரசித்த
முதல் ஆண்மகன்,
முதல் அறிவாளி,
முதல் சாகசககரன்,
முதல் எல்லாம் தெரிந்தவன்,
தன் இயலாமையை உணர்ந்த
முதுமையிலும்கூட
எனக்குத் தெரியாத
இன்னும் பலவற்றை
ஓயாமல் கற்றுத் தந்தவன்
ஓய்ந்திருப்பதை காணச் செல்கையில்
ஜன்னல்வழி விரியும் உலகில்
எதிர்ப்படும் பசுமைகள்
என் ரசிப்புக்காகக் காத்திராமல்
ஒன்றன்பின் ஒன்றாக வந்துவந்து
துக்கம் விசாரித்து அகன்றபடியிருந்தன;
அவ்வப்போது முட்டிவரும் கண்ணீரை
என் கரம் துடைக்குமுன்னே
ஆறுதலாய் துடைத்துவிட்டு
சட்டென மறைகிறது எதிர்க்காற்று;
என் தந்தையைக் காயப்படுத்திய
குஷிப்படுத்திய
அத்தனை நினைவுகளையும்
மீட்டெடுத்தபடியே
என் தந்தையின் வயதொத்த
சக பயணிகளிடமும்
தேனீர், முறுக்கு வியாபாரிகளிடமும்
அவரைத் தேடிக்கொண்டே பயணிக்கிறேன்;
நினைவுச் சுழலில் சிக்கிய
என் தொடையில்
தன் பிஞ்சுக் கரத்தால் தட்டி
"அப்பா ஒண்ணுக்கு"
என்றழைக்கும் பையனிடம்
என் பால்யம் வந்து ஒட்டிக்கொள்ள
என் தந்தையாகிறேன் நான்!

லாஸ்ட் பெஞ்ச் குறிப்புகள்!

2012-01-19T23:33:00.001-08:00

பள்ளிக்கூடத்தின் சுற்றுச் சுவருக்கு
வரப்போகும் பொங்கலுக்காக
அடித்த வெள்ளையில்
காணாமல் போயின
நான் உருவாக்கிய
காதலர் சாம்ராஜ்யங்கள்!
******
தரையில் உட்கார்ந்த எனக்கு
உயர்நிலைப் பள்ளியில்
பெஞ்சு போட்டுக் கொடுத்தார்கள்;
அப்போதும் நிறுத்தவில்லை
அடிப்பதை மட்டும்!
******
ஓட்டை உடைசல் பெஞ்ச்சை
கடைசி வரிசையில்தான்
போட்டு வைத்திருக்கிறார்கள்;
எந்த வகுப்பிலும்
நல்ல பெஞ்ச் கிடைத்ததேயில்லை!
******
'மகா'விடம் அடிக்கடி வழியும்
சயின்சு வாத்தியாரை
கல்லால் அடித்தது யாரென்று
கடைசி வரை தெரியவேயில்லை;
இருந்தும்
என் மீது சந்தேகம் தீரவில்லை!
******
என்னொட ஸ்கேலை வாங்கி
என்னையே அடித்து
உடைத்த ஆசிரியரும் உண்டு;
உடைத்த ஸ்கேலை ஒருபோதும்
வாங்கித் தந்ததில்லை!
******
வகுப்பு வாத்தியாராக
வரக்கூடாதென்று
அனைவராலும் வேண்டப்படும்
கண்ணா வாத்தியார் மட்டும்
ஹெட்மாஸ்டரிடம்
வேண்டிக் கேட்டுக்கொண்டார்
இவனை வேற செக்சனுக்கு
மாத்திடுங்க என்று!

ஒற்றைக் கொம்புக் குதிரை!

2012-01-19T23:30:00.001-08:00

அந்த அபூர்வமான
ஒற்றைக் கொம்புக் குதிரை
பல வருட இடைவெளிக்குப்பின்
என் கனவிலே வந்தது
என் பால்யத்தின்
படக்கதை நாயகனாக
ஆச்சர்யங்கள் பல செய்து
பறந்து திரிந்த
அதன் சிறகுகள் அடங்க
மெல்ல நடைபோட்டு அருகில் வர
வாஞ்சையுடன் தடவினேன்
என் முகத்தை தன் முகத்தால் உரசி
தன் அன்பை வெளிப்படுத்தியது
சற்று நேரத்திற்கெல்லாம்
இன்னமும் விலகாத
அதன் ஒற்றைக் கொம்பு ரகசியத்தை
என்னிடம் சொல்லாமலேயே
விர்ரென்று கிளம்பி
விண்ணில் பாய்ந்து மறைந்தது...
அங்கே படர்ந்திருந்த
வண்ண ஒளிக்கலவை மெல்ல கலைந்து
இருள் மீண்டும் கவ்வ
தொலைந்தது என் பால்யம் தூக்கத்தினுள்!

சத்தம்!

2012-01-19T23:29:00.000-08:00

மனிதர்களின் பேச்சுக்குரல்கள்
வாகனங்களின் பேரிரைச்சல்
ஒலிபெருக்கியின் திரையிசைப்பாடல்
செல்பேசியின் அழைப்புகள்
குழந்தையின் அழுகை
மரக்கிளைப் பறவைகளின் கூக்குரல்
காற்றிலசையும் சருகுகள் ஓசை
ஆழ்நிலை குறட்டையொலி
அத்தனை சத்தங்களும் களைந்த
நிர்வாண உலகத்திற்கான தேடல்
மூச்சுச் சத்தம்
மவுனிக்கும்வரை கிட்டாமல் போக,
ஒப்பாரிச் சத்தத்திற்கிடையே
தூக்கிச் செல்லப்பட்ட உடலுக்கு
இறுதியாய்க் கேட்டது
'சட சட'வென ஏதோவொன்று
பற்றியெரியும் ஓசை!

உனக்கும் எனக்குமான உரையாடல்!

2012-01-19T23:28:00.000-08:00

உனக்கும் எனக்குமான
உரையாடல்களில்
வேறொன்றும் விசேஷமில்லை
அவை
உனக்கான என் வரிகள்
எனக்கான உன் வரிகள்
என்பதைத் தவிர!

நமக்கான வார்த்தைகள்
சிதறிடாமல்
குழந்தையைக் கைமாற்றுவதுபோல்
பக்குவமாகத்தான் பேச்செல்லாம்...
குழந்தையின் சிணுங்கல்கள் மட்டும்
சிலநேரம்!

உன் உதடு பிரித்து
நழுவும் வார்த்தைகள் மட்டுமே
காதினுள் புகுந்து அலைந்திடாமல்
நேரே மனதினுள் நுழைந்திட
அனுமதிக்கிறேன்!

இத்தனை காலமாய்
நான் சேமித்த ரகசியங்களனைத்தும்
எத்தனை இலகுவாய்
அவிழ்கின்றன
உன் வார்த்தை தொட்டதும்!

சிலநேரம்
உன் மவுனங்களுக்கான
வார்த்தைகளையும்
நானே நிரப்பிக் கொள்கிறேன்
அதன் அர்த்தங்கள்
உன் அகராதியில் இனிமையாகவே!

நம் உரையாடல்களில் மட்டும்
நீயும் நானுமாய்
தள்ளித் தள்ளி வைப்பதால்
முற்றுப்பெறாத பயணத்தில்
முற்றுப்புள்ளி!

இனிய பொங்கல் நல்வாழ்த்து!

2012-01-19T23:25:00.000-08:00

வற்றிப்போன ஆற்றுக்கே தெரியாமல்
மண்ணை வெட்டி விற்கும்
மண்ணாசை மனிதரிடையே
உழுதுபோட்டு
வியர்வையோடு
உரங்களையும் கலந்து போட்டு
மண்ணை வளப்படுத்தும்
மண்ணின் மைந்தர்களாம்
உழவர்களின் திருவிழா!

வயல்வரப்பிலும்
ஊரணி மேட்டிலும்கூட
சாகடிக்கப்பட்டுவரும்
விளைநிலங்களின் நினைவாக
எழும்பியுள்ள அளவைக்கல்
மனதை வருத்தினாலும்
சுனாமியாகி சுற்றியடித்தாலும்
புயலாகிப் பெயர்த்தெடுத்தாலும்
இன்னமும் கலங்காமல்
பசுமை வளர்க்கும்
இயற்கையின் காவலர்களாம்
உழவர்களின் திருவிழா!

பகட்டான உடையில்லை
ஆடம்பர அணிகளில்லை
வரப்புமேட்டிலேயே வாழ்ந்தாலும்
மேட்டுக்குடி செருக்கில்லை
உச்சிவெயில் பார்த்தே
நேரத்தைச் சொல்லிடும்
நேர்த்தியின்னும் குறையவில்லை
அத்தனையும் விளைவித்தாலும்
விலை நிர்ணயிக்கும் உரிமையில்லை
இருந்தும்
வயல்வெளிவிட்டு விலகிட மனமில்லா
வெள்ளந்தி மனிதர்களின்
உள்ளம்மகிழ் திருவிழா!

சேற்றினில் கால்பதிக்க,
நாற்று வளர்ந்து
நெல்மணியாகும்வரை
காத்திருக்கப் பொறுமையற்று,
விளைநிலங்களை விட்டுவிட்டும்,
விற்றுவிட்டும்
மாற்றுப் பாதை நடக்கும்
பரபரப்பு மனிதரிடையே
விதைதூவி, நாற்று பறித்து,
காலத்தே களைபறித்து,
வலிமைசேர் உரமிட்டு,
வேரின் தாகம்தீர்த்து
தேகம் சிரிக்கும் பயிரை
பார்த்துப் பார்த்து வளர்க்கும்,
பொறுத்து பூமியாள்வோரின் திருவிழா!

வாழிய உழவு! வாழிய உழவர்!
வாழ்க நற்றமிழர்!
அனைவருக்கும் இனிய பொங்கல் நல்வாழ்த்து!

பட்டுச்சேலை

2012-01-19T23:23:00.000-08:00

தன்னை நெய்த பொழுதினும்
பெரிதுவக்கின்றன
உன் வீட்டு பீரோவிலிருக்கும்
சேலைகள்!
எச்சிலை இழையாக்கி
சுற்றிக்கொண்டு உயிர்நீத்த
பட்டுப் புழுக்கள்
மோட்சம் பெற்றன
அந்த சேலைகளை
நீ சுற்றிக்கொண்ட நொடிகளில்!

நீயில்லாத பக்கத்து வீடு!

2012-01-19T23:10:00.000-08:00

எங்கள் வீட்டிற்கு
அடுத்த வீட்டின் முகவரியே
நீ வந்த பிறகுதான்
எனக்கு அறிமுகம்!
உன் வீட்டு முகவரியால்
என் வீட்டுக்கும்
முகவரி கொடுத்தாய் நீ!

கூடுடைத்து வரும்
கோழிக்குஞ்சைப் பார்க்கும்
பரவசம்தான்
உன் வீட்டை விட்டு
ஒவ்வொருமுறை
நீ வெளிவரும்போதும்!

இழுத்துச் செருகிய தாவணி
துப்பட்டா போர்த்திய சல்வார்
முழுக்க மூடிய முந்தானை
அத்தனையிலும்
கண்ணியமாகத்தான்
வலம் வருவாய்;
கண்ணியமாக
நீ வைத்த கண்ணியில்தான்
என் கன்னி வீழ்ச்சியே
தொடங்கியது!

பேசத் துடிக்கும் வாய்
கோர்க்கத் துடிக்கும் கரங்கள்
அருகாமை தேடும் பாதங்கள்
அத்தனை உறுப்புகளும்
உன்னால் ஒருமித்திருக்க
இதயமும் உடன்சேர்ந்து
துடிக்காமல்
சிலநேரம் சிரிக்கும்!

நீ எதிர்ப்படும்போதெல்லாம்
என்னுள்ளே
பாரதப்போரே நடக்கும்;
வழக்கம்போல்
உன் முன் தோற்று
நிராயுதபாணியாகி
எனக்கு நானே
சமாதானமாகிப் போவேன்!

என் வீட்டுச் சுவற்றின்
மறுபக்கத்தில்தான்,
மிகவும் பக்கத்தில்தான்
நீயென்றாலும்
ஒருமுறை கூட
உன்னோடு பேசியதில்லை!

உன் பார்வை
என்னைச் சந்திககாத வேளைகளில்
உன்னைச் சந்தித்து வருவதே
தினசரி வேலையாக
உன்னைப் பின் தொடரும்
என் பார்வை!
மவுனப்பார்வையால்கூட
உன் பார்வையைச் சந்திக்கும்
சக்தி வாய்த்ததில்லை!

உனக்காக பலமுறை
தெருப் பசங்களோடு
சண்டையிட்டிருக்கிறேன்
அதுவும்
உனக்குத் தெரிந்திருக்க
வாய்ப்பில்லை!

வாடகை வீடுகளின் சந்திப்பும்
ஒருவித ரயில் சினேகமென்பதை
புரிந்திருந்தாலும்
நீ வீடு மாறியபோதுதான்
முதல்முறை உணர்ந்தேன்
புரியாத ஏதோவொன்றை!

நானுமில்லாத அந்த தெருவிற்கு
இப்போது சென்றாலும்கூட
நீயில்லாத பக்கத்து வீட்டையும்
நீயில்லாத தெருவையும்தான்
பார்க்க முடிகிறது!

அவளோடு நான் - கவிதைச் சரம்!

2011-11-09T05:36:00.000-08:00

அவளோடு நான் - 1

அவளைச் சிந்திப்பதற்கு முன்
சிந்தித்த பின் என்றே
எனக்கான வரலாறு எழுதப்பட வேண்டும்!

அவளோடு நான் - 2

அவளைப் பற்றி
சிந்திக்கத் தொடங்கிய பின்பே
என்னைப் பற்றி
சிந்திக்கத் தொடங்கியது உலகம்!

அவளோடு நான் - 3

இப்போதெல்லாம்
அவள் மனதிலிருந்து
அவளின் உதடுகளால்
வடிகட்டித் தரும் வார்த்தைகளை
சுவைப்பதற்காகவே
காத்திருக்கிறேன் தினமும்!

அவளோடு நான் - 4

அவள் பேசும்போது
உதடுகளை எட்டியெட்டிப் பார்க்கும்
அவளது முன்நெற்றியின்
சிறு கற்றை முடிகளை
அடிக்கடி விலக்கி விடும்
விரல்களைப் போலவே
என் கண்களும் மனதும்!

அவளோடு நான் - 5

எனக்கென அவள் சிந்திய
மெல்லிய நூல் சிரிப்பிலே
நாளெல்லாம் பறக்கிறேன்
உலகினின்று விடுபட்ட
காற்றாடியாக!

அவளோடு நான் - 6

அவளால் எழுதிய கவிதையை
சொல்லித் திரிகிறேன்
எனது கவிதையென!

அவளோடு நான் - 7

எங்கள் காதுகளுக்கும்
கேட்காமல் தான்
ரகசியங்கள் பரிமாறுகிறோம்
உதடும் உதடும்
ஒட்டிய மாதிரி!

அவளோடு நான் - 8

மருதாணி பூசிக் கொள்கிறாள்
முகப்பூச்சு பூசிக்கொள்கிறாள்
நகப்பூச்சு பூசிக்கொள்கிறாள்
என்னையறியாமல்
மகிழ்ச்சியை பூசிக்கொள்கிறேன்
அவளைப் பார்த்ததுமே!

அவளோடு நான் - 9

அவளைச் சந்திக்கும்போதெல்லாம்
ஏதேனும் சிறு அன்புப் பரிசை
வாங்கித் தருகிறேன்;
அவளும்
முதல்முறை பார்க்கும்
பரவசத்துடன் தான்
ஒவ்வொருமுறையும் பார்க்கிறாள்;
பரிசையும், என்னையும்!

அவளோடு நான் - 10

என்னுள் வாசம் செய்யும்
அவளின் அருகாமை
தினம்தினம்
என்னை வசப்படுத்தும்
அவளின் வாசத்தால்!

அவளோடு நான் - 11

அவளுக்காக காத்திருந்த
நிமிடங்களின் நொடிகளுக்குள்
போட்டி நடக்கும்;
ஏதோ ஒரு நொடி
அவளை அழைத்து வந்து
என் முன் நிறுத்தும்!

தீபாவளிக் கவிதைகள்

2011-10-25T01:15:00.000-07:00

கம்பி மத்தாப்பின் பொறிகளை
ரசிக்கப் பிடிக்கும்,
அந்த வெளிச்சத்தில்
அவள் முகம் காணும்போது!
லட்சுமி வெடியைப் பற்றவைக்கையில்
உதறும் கைகள், பதறும் நெஞ்சம்
சிதறியோடும் துள்ளல்
அத்தனையையும் ரசிக்கலாம்
அவள் வெடிக்கும் வரையில்!
********

முதல்முறை அணைந்தது;
முனை கிள்ளிப் பற்றவைக்க
மறுபடி அணைந்தது;
தீக்குச்சி கொளுத்த
புசுபுசுவெனப் பொறிந்து
முடிவில் அணைந்தது;
அடுப்பிலே விட்டெறிந்தும்
இறுதிவரை வெடிக்கவேயில்லை
இனாமாய் கிடைத்த பட்டாசு!
********

தற்காத்து
தற்கொண்டார் பேணும் இயற்கை
விட்டுவிட்டு மழை பொழிந்து
ஓசோனையும் ஓலைக்குடிசையையும்
பொசுங்காமல் காத்தபடி!
********

கல்யாணக்கல் காணாமப் போச்சு;
காளை அடக்குவதையும்
கட்டுப்படுத்தியாச்சு;
வீரத்தைக் காட்ட
வேறு வழியில்லை இளைஞர்க்கு,
உள்ளங்கையில் பிடித்து
அணுகுண்டு வெடிப்பதைத் தவிர!
********

பாதுகாப்பான தீபாவளி
பாதுகாப்பான தீபாவளி
அனல் பறக்கும்
காவல்த்துறை பிரச்சாரம்
காணாமல் போகும்
பட்டாசு தயாரிக்கும்
தொழிலாளர் பாதுகாப்பில்!

கழைக்கூத்துச் சிறுமி!

2011-10-12T05:25:00.000-07:00

அந்தரத்தில் நடந்தும்
தலைகுப்புறக் கவிழ்ந்தும்
பின்னோக்கி வில்லென வளைந்தும்
பலமுறை பல்டியடித்தும்
சிந்திட உள்ளுக்குள் ஒன்றுமில்லா
வெற்று வயிறென நிரூபித்தபின்
யாசகம் கேட்டு வருகிறாள்
கழைக்கூத்துச் சிறுமி!

வேண்டாம் இன்னொருமுறை!

2011-10-10T05:37:00.000-07:00

அலைகளும் பலமுறை வந்து
ஏமாந்து திரும்பி விட்டன
... உனக்காகக் காத்திருந்த நிமிடங்களில்!

காணும் வரை இறுகிய முகம்
நீ நெருங்கவும் நொறுங்கியது
கடற்கரையில் மணலாய்!

சின்னச் சிணுங்களில்
சின்னாபின்னமாகி போனது
சேமித்து வைத்திருந்த கோபமெல்லாம்!

திட்டித் தீர்க்க வேண்டுமென்ற
திட்டமும் தவிடுபொடியானது
செல்லத் தீண்டலில்!

கொட்டிக் குவிக்க வைத்திருந்த
வர்த்தைகளெல்லாம்
முடிச்சே அவிழ்க்கப்படாமல்!

என் கோபமே
என்னைக் கேலி செய்கிறது
உன்னோடு சேர்ந்துகொண்டு!

இனியொரு முறை தவிக்க விடாதே
தோற்றே பழகிப்போன
வீராப்புகளை என்னோடு!See more

பேருந்து நிமிடங்களில்...

2011-10-10T05:32:00.000-07:00

திருவிழா அரங்க முகப்பில்
குலை தள்ளிய வாழைகளாக
வாயில்களில் தொங்கும் கூட்டம்!
---

டிக்கெட்டுக்காகக் கொடுத்தனுப்பும் பணம்
நல்வாய்ப்பாக ஆசிர்வதிக்கப்படும்
அழகிய பெண்ணின் கரத்தால்!
---

பறக்கவில்லை
ஊர்ந்துதான் செல்கிறது
சிக்னல்கள்தோறும் கவுண்ட் டவுன்!
---

வழிநெடுக ஒட்டப்பட்ட போஸ்டர்களும்
சிறுநீர் கழிக்காதே எச்சரிக்கையும்
திரும்பத் திரும்ப வாசிக்கப்படும்!
---

பயணச்சீட்ட்டு வங்கிய குற்றவாளிகளால்
தள்ளப்படும்
மா"நகரா"ப் பேருந்துகள்!
---

பக்கத்து இருக்கையில் அமர்ந்து
தூங்கிச் சரிபவரின்
கனவைக் கலைத்தபடி நான்!

ஹைக்கூ சரம்!

2011-10-06T04:33:00.000-07:00

மதுபானக் கூடுதல் விற்பனையில்
அள்ளப்படுகிறது
கிள்ளிக் கொடுத்த போனஸ்!

அதிகாலையில் ஓடுபவர்களை
துரத்தும்
நாய் நோய் பயம்!

நடுத்தெருவில் உடைத்த பூசணிகளும்
சிதறிய சில்லறைகளும்
கண்ணகிகள் அரியணையில்!

ஹைக்கூ சரம்!

2011-10-04T04:13:00.000-07:00

பாகற்காயினுள்ளிருந்த புழு
எட்டிப் பார்க்கவேயில்லை
விலைபேசி வாங்கி முடிக்கும்வரை!
-----------------------------------

மெல்ல ஊற்றெடுக்கும் மகிழ்ச்சி
தங்கம் விலை
வற்ற வற்ற!
-------------------------------

மழை நின்ற வெயிற்பொழுதில்
இலைகளைக் காய வைக்கும்
மரம்!
-------------------------------

மகிழ்ச்சியைத் தவிர
வேறொன்றுமில்லை
மழலையின் சிரிப்பில்!
--------------------------------

பந்திக்கு முந்தாமல் தடுக்க
கையில் திணிக்கப்பட்டது
அட்சதை அரிசி!
--------------------------------

ஊருக்கெல்லாம் பெய்த மழையில்
என்னை நனைத்தன
எனக்கான மழைத்துளிகள்!
---------------------------------

இரவு வரும்போதெல்லாம்
பீதியை போர்த்திக் கொள்ளும்
தூங்காத அசைவுகள்!
---------------------------------

ஊனமுற்ற பிச்சைக்காரரை
கடக்கையில் ஊனமாகிறேன்
பையில் சில்லறையில்லாத போது!

உனக்காக...

2011-10-04T03:38:00.000-07:00

முந்த முயற்சித்து
முட்டிமோதிச் சிதறும் எழுத்துக்கள்
வார்த்தைகளில்
இடைபுகுந்தும், இடம்மாறியும்
பெரும்பாலும் தப்பும் தவறுமாகவே
உனக்காக
நான் எழுதும் கவிதைகள்!

துளித் துளியாய் கவிதைகள்!

2011-10-04T03:36:00.000-07:00

மெல்லத் தலை நகர்த்திப் பிறந்து
விழி திறவாமல் சிரித்து
தானே தவழ்ந்து எழுந்து
நடைபயிலும் குழந்தை
ஒவ்வொரு விடியலிலும்!
--------------------------

எதாவது குழந்தையின் வீட்டில்
ஒதுங்கியிருக்கும் நிலவு
மழை நேரத்தில்!
--------------------------

எந்நேரமும் மவுனம் உடைபடலாம்
சிறு தீண்டல் போதும்
காத்திருகும் கார்மேகங்கள்!
--------------------------

தோகை விரித்தாடும் மயில்
தேடிக் களைந்த வாடைக்காற்று
வீடு நுழையும் அந்தி!
--------------------------

அகிம்சை போர்த்தித் திரியும்
இம்சைகள்
காந்தியின் பெயராலே!

சரஸ்வதி பூஜை

2011-10-04T03:29:00.000-07:00

சரஸ்வதி பூஜையில்
அண்ணனின் பங்காக
அஞ்சாம் வகுப்புப் புத்தகங்களும்
தங்கையின் பங்காக
ஒண்ணாம் வகுப்புப் புத்தகங்களும்
அம்மாவின் பங்காக
சமையல் குறிப்புப் புத்தகங்களும்
வரிசைகட்டி நின்றன;
அப்பாவின் பங்காக வைக்க
வேறொன்றுமில்லை...
கல்விக் கட்டண ரசீதுகளைத் தவிர!
------------------------------------------------

சரஸ்வதி பூஜைக்கு
பள்ளியில் மாணவர் சேர்க்கை
லட்சுமி பூஜை!

பாடுபொருள் படும்பாடு!

2011-09-29T06:38:00.000-07:00

பாடுபொருள் காதலாகிப் போனால்
சிக்கல் வந்துசேரும் கவிஞனுக்கு!
பாடப்படுபவள் யாரென்றறியும் ஆவல்
இயல்பாகவே எழுந்துவிடும் வாசிப்பவருக்கு!
எழுதும்போதெல்லாம் யோசித்ததில்லை
யோசிக்கிறேன் கேள்வியெழும்போதெல்லாம்!
எந்த உருவமும் சரியாகப் பிடிபடவில்லை
"அவங்க உங்க மனைவி தான?"
பொய்யுரைக்கத் தூண்டும் கேள்விகளும் அவ்வப்போது!
கவிஞன் ஊற்றெடுக்கும் தலைக்காவிரியாக
காதல் கவிதைகள் வழிந்தோடும் ஊரில்
மீசை அரும்புமுன் அரும்பிடுமே இந்த ஆசை!
நிஜத்தைக் காதலிக்கும் தைரியமற்று
கற்பனையில் காதலிக்கும் ஜாதியில் வளர்ந்து
கூடாமல் கூடிக் கலந்த காதலில்
கரு கூடாமல் போன சோகமும்,
கலைந்துபோன கர்ப்பத்தின் வலியும்,
குறைமாதக் குழந்தையின் பதைபதைப்பும்,
வழிமறக்கச் செய்த சுகப் பிரசவமுமாய்
அத்தனை அனுபவத்தையும் பிரசவித்தாலும்
காரணம் யாரென்றறியும் ஆர்வம் குறைவதில்லை!
காதலை உணர்த்தி, வரிகளில் வழிந்து,
கவிதையாய் நிறைந்து ஓடுபவளின் உருவம்
காண முடியாததை எப்படிச் சொல்வேன்?
தாகம் தணிக்கும் தண்ணீரின் உருவம்
இப்படித்தான் இருந்ததென்று!

காதலுடன்...

2011-09-29T06:12:00.000-07:00

பேனாவைக் கவிழ்த்தியதுமே
காகிதமெங்கும் கொட்டியது
உனக்கான என் மனது!

நீ வாசிப்பாயென்ற நப்பாசையில்
தானாகவே வந்து
கோர்த்துக் கொண்டன எழுத்துக்கள்
உனக்கான கவிதையில்!

உன் அழகை வர்ணித்து
எதுவும் எழுதவில்லை
இயல்பான அழகுக்கு
வர்ணனைப்பூச்சு தேவையில்லை!

உன் மீதான காதலை
இக்கவிதையில் சொல்லவில்லை
உன் பெருமையை
உன்னிடமேவா சொல்லிக்காட்டுவது?

இப்படித்தான்
குழம்பிப் போகிறேன்
என் சிந்தனையில் உன் முகம்
பட்டுத் தெறிக்கும்போதெல்லாம்!

நீ பிரித்துப் படித்தால்
மகிழ்வேன்!
நாமிருவரும் சேர்ந்து படித்தால்
இக்கவிதை மகிழும்!

காதல் சொன்ன பருவம்!

2011-09-29T05:00:00.000-07:00

முற்றிலும் அவள் நினைவாகவே
திரிந்து போனது என் மனது
நொதிக்கச் செய்த முதல் துளியை
தேடிச் சுவைக்கத் துடிக்கிறேன்!

அவள் என்ன பேசினாலும்
யோசிக்காமல் ரசிக்கப் பிடிக்கிறது
இந்த ரசனை வந்து அப்பிக்கொண்ட
முதல் வரியைத் தேடிப் பார்க்கிறேன்!

அவளை மையமாகக் கொண்டே
சில காலமாகச் சுழலுது பூமி
சுழற்சி தடம்மாறிப்போன நொடி தேடி
கடிகாரத்தைப் பின்னோக்கிச் சுழற்றுகிறேன்!

பக்குவமாய்ப் பேசி மொட்டவிழ்த்து
மெல்லிதழ் தோகை விரியச் செய்து
சுவாசமெல்லாம் அவள் வாசத்தால்
நிரப்பிய பொழுதைப் புரட்டிப் பார்க்கிறேன்!

உந்தி உதைத்து, சிறுகச் சரிந்து
உருண்டு உடல் நழுவி, மெல்ல நகரும்
மழலையின் முதன்முயற்சியாய்
அவள் மனதை எட்டிப் பிடித்த பரவசத்தை
உணரத் துடிக்கிறேன் மீண்டும் குழந்தையாகி!

துளிப்பா கோவை!

2011-09-29T02:43:00.000-07:00

பந்திக்கு முந்தாமல் தடுக்க
கையில் திணிக்கப்பட்டது
அட்சதை அரிசி!
-----------------------------------

ஊருக்கெல்லாம் பெய்த மழையில்
என்னை நனைத்தன
எனக்கான மழைத்துளிகள்!
----------------------------

இரவு வரும்போதெல்லாம்
பீதியை போர்த்திக் கொள்ளும்
தூங்காத அசைவுகள்!
-------------------------------

ஊனமுற்ற பிச்சைக்காரரை
கடக்கையில் ஊனமாகிறேன்
பையில் சில்லறையில்லாத போது!
--------------------------------

இன்னமும்
தூங்காத குழந்தையின் சிணுங்கல்
விழித்தபடி நிலவு!
-------------------------------

வீட்டு உரிமையாளருக்குத் தெரியாமல்
மீன் சமைக்கும்போது
காவல் காத்தது பூனை!
-------------------------------

குழந்தைகள் தூக்காததால்
உயிர்ப் பெறாத
கொலு பொம்மைகள்!
-------------------------------

யாரோ ஒருவனை அணைத்தபடி
யாரோ ஒரு வசீகரமான பெண்
தினமும் கடந்து செல்கிறாள்
போக்குவரத்து நெரிசல்களில்!
-------------------------------------------

குட்டிக் குட்டிக் கார்களும்
அமுக்கினால் கத்தும் பொம்மைகளும்
மட்டுமே போதுமாயிருக்கிறது
என் மகனுக்கு;
நாள் முழுக்க சந்தோசமாய் கழிக்க!
-------------------------------------------

பறவைகளில்லாத நேரம்
வத்தி வைத்துச் செல்கிறது
காற்று!

2011-09-21T05:53:00.001-07:00

தெருவிளக்கு எரியவில்லை
இருளில் மூழ்கியது
காக்கையின் கூடு

2011-09-21T05:52:00.000-07:00

கோவிலில் பார்க்குமிடமெல்லாம்
உபயம் எழுதியிருக்கிறது;
எப்படி நம்பிக்கை வரும்?
சில்லறை போடக்கூட
வக்கில்லாத எனக்கு!

2011-09-19T03:08:00.001-07:00

கூரை ஓட்டை வழியே
உறங்கும் இடந்தேடி வந்தது
நள்ளிரவின் கனத்த மழை!

2011-09-15T01:29:00.001-07:00

சேகரிப்பதற்கு யாருமில்லையென்றாலும்
வெண்மை நிறப் பன்னீர்ப் பூக்களை
உதிர்த்துக் கொண்டேயிருக்கிறது!

சாவின் துயரம்

2011-09-12T03:28:00.000-07:00

சாவின் துயரம் எனக்கு அறிமுகமானது
எப்போதென்று நினைவில்லை
விடிய விடிய கொட்டித்தீர்க்கும் அடைமழையாக
சுற்றியமர்ந்து உறக்கமின்றி அழுபவர்களை
கொட்டக்கொட்ட விழித்துப் பார்த்திருக்கிறேன்;
ஓடியாடித் திரிந்தவர் நாடியடங்கி,
நாடி கட்டப்பட்டு நடுக்கூடத்தில் வீற்றிருக்க
பெருங்குரலெடுத்து அழுபவர்களைப் பார்த்து
கட்டுடைத்து ஒருபோதும் எழும்பியதில்லை;
என்னையும் கூட்டிட்டுப் போகக்கூடாதா
என்றுதான் பெரும்பாலான உறவுகள்
அழுகையினூடே விண்ணப்பிக்கிறார்கள்...
வாங்க யாருமில்லையென்று தெரிந்தே!
பெருமீசை மனிதர்களும்கூட ஓவென்றரழும்போது
மீசைக்குள்ளிருந்து எட்டிப்பார்க்கும்
குழந்தையைக் கண்டு வியந்திருக்கிறேன்;
நினைவலைப் பின்னலில் சிக்கிய பூச்சியாக
எதோ ஒருமூலையில் வாய்பொத்தியபடி
குமுறியழுபவர்களையும் பார்த்திருக்கிறேன்;
பிறருக்குப் புரியாத அந்தரங்க அழுகை அது!
எதிர்பார்த்த மரணம்போல் இயல்பாகப் பேசி,
ஏதும் காட்டாமல், எல்லாம் முடித்து
சுடுகாட்டில் பானையுடையும்போது
உடைந்து கதறியவர்களையும் கண்டிருக்கிறேன்;
செத்தது தன் தந்தையென்றே அறியாமல்
வந்திருந்த உறவுச் சிறுவர்களோடு
அங்குமிங்கும் திரிந்து விளையாடிய
குழந்தைகள் சார்பாக
நானும் சிலமுறை உடைந்திருக்கிறேன்!

உடைக்காத காதல்!

2011-09-08T00:16:00.000-07:00

மனதுள் நீயே நிறைந்துவிட்டாய்
படிக்கட்டில் தொற்றியபடி
என் பயணம்!

எனக்காகத் துடித்த இதயம்
தடம் மாறித் துடிக்கிறது
சில நேரம் சிரிக்கிறது!

உன்னை விரும்பும் என்னை
உனக்கும் பிடிக்க வேண்டுமென்று
விரும்புகிறேன்!

எத்தனையோ பேரைப்போல
கடந்து செல்ல முடியவில்லை
வெறும் வழிப்போக்கனாய்!

உனக்கான என் காதல்
இன்னமும் பல்லிடைக் கடுகாக
சொல்லவும் முடியாமல்!

நம்பிக்கையோடு இருக்கிறேன்
முட்டை உடையாமலேயே
குஞ்சு பொறிக்குமென!

2011-09-06T04:36:00.001-07:00

இன்னமும் மடித்து வைக்கப்படாத
அந்த இறுதிக்கட்டத் தூக்கம்
அலாதியானது...
கனவறுந்து போன பொழுதுகளில்
பகற்பொழுதின் அவசரங்கள் வந்து
அப்பிக்கொள்ளக் காத்திருக்கையில்
செல்லக் குழந்தையென
தலையணையை மெல்ல அணைத்து
இருளுக்கும் புலர்வுக்குமிடைப்பட்ட
அதிகாலையைப் பிழிந்தெடுத்து
தன்னை மறக்க வைத்த உறக்கத்தை
விழிமூடி சிலநொடிகள் அனுபவித்து
விடியலில் வழியனுப்புகையில்
இன்னும் சில கணங்கள் நீட்டிக்கும்படி
கோரிக்கை எழுப்பத் தோன்றும்
சிணுங்கிடும் கடிகாரம் பார்த்து!

பள்ளிப்பருவம் - 1

2011-09-06T03:29:00.003-07:00

அதே காதுகிழிக்கும் மணியோசைதான்
பள்ளி விடும்போது மட்டும்
மனதுக்கினிய இசையாக!

பள்ளிப்பருவம் - 2

2011-09-06T03:29:00.001-07:00

எத்தனை முறை ஒடித்தும்
ஒருபோதும் திருந்தியதில்லை
பிரம்புடன் திரியும் மணி வாத்தியார்!

பள்ளிப்பருவம் - 3

2011-09-06T03:28:00.001-07:00

கருப்பசாமிக்கு
ஆட்டுக்குட்டியை நேர்ந்துவிட்ட
எங்கப்பனின்
ஆயிரத்தெட்டு வேண்டுதல்களோடு
அஞ்சாப்பு "பி" செக்சன் வாத்தியாராக
சுப்ரமணி வாத்தியார் வரக்கூடாதென்ற
என்னோட வேண்டுதலும் அடக்கம்!

பள்ளிப்பருவம் - 4

2011-09-06T03:27:00.003-07:00

"ஜனகணமண" அர்த்தம் விளங்கியதில்லை
தினமும் கால்கடுக்க ரசிப்பேன்...
ரமா, சந்திரா பாடும்போது!

பள்ளிப்பருவம் - 5

2011-09-06T03:27:00.001-07:00

மூச்சடக்கி முங்கு நீச்சலடித்தவன்
சுவாசத்தைச் சுவைக்கும் மகிழ்ச்சிதான்
விளையாட்டுப் பாடவேளை நேரத்தில்!

2011-09-06T03:26:00.000-07:00

மரக்கிளையில் சிக்கிய காற்றாடியை
வேடிக்கை காட்டி உணவூட்டியது
தாய்ப்பறவை!

2011-08-31T00:34:00.001-07:00

கீழே விழுமோ என்பதை விட
மேலே விழுமோவென்ற பயம்தான்
உத்திரத்துப் பல்லி பார்க்கும்போதெல்லாம்!

செங்கொடி உயரட்டும்!

2011-08-29T05:13:00.000-07:00

அன்று
ஒரு முத்துக்குமார் பற்றவைத்தான்
இன்று பற்றவைத்திருக்கிறாள்
செங்கொடி!
செங்கொடியேந்திப் போராடும்
மனிதரிடையே
செங்கொடியே போராடி
வீழ்ந்திருக்கிறது!
கொடிகாத்த குமரனின் கூட்டமோ
எள்ளி நகையாடுகிறது!

படுகொலையைத் தடுக்க
தன்னையே தொலைத்திருக்கிறாய்...
ஆம்;
"என்னுயிரை எடுத்துக்கொண்டு
என் மகனைக் காப்பாற்று"
என வேண்டும் தாய்க்கும்
உனக்கும் வித்தியாசமில்லை!
இந்திய ஜனநாயகத்தின் கோரப்பசிக்கு
இன்னொரு உயிர் கிடைத்ததே
மிச்சம்!

நம் தமிழ்நாட்டிலேயேதான்
பாதுகாப்பாக இருக்கிறது...
நம் தமிழர்களை
கொல்லக் காத்திருக்கும்
தூக்குக் கயிறு!
அறுத்தெரியவும் முடியாமல்
எரிக்கவும் முடியாமல்
தன்னையே எரித்துவிட்டாயே!
உன் மனது
எவ்வளவு தூரம் எரிந்திருக்கும்?

அன்னாஹசாரேக்களால்
இருட்டடிக்கப்பட்ட
சகோதரர்களின் உயிர்ப்பிரச்சனையில்
ஊடக வெளிச்சமில்லாததால்
உன்னையே வெளிச்சமாக்கி
மாய்ந்தாயோ?

அறிவாளித்தனமாக
ஒதுங்கிச் செல்ல மட்டுமே
பழகிப்போன கூட்டம்,
முட்டாள்த்தனமென்று
எளிதாகச் சொல்லிவிடுகிறது...
துருப்பிடித்த
இரும்பு மனதோடு!

தமிழகத்தில் வாழும்
இந்திய காங்கிரஸ்வாதிகளே!
உங்கள் அரசியல் நலன்வேண்டி
பணிவான வேண்டுகோள்;
"ராஜீவ்காந்தி படுகொலை!
ராஜீவ்காந்தி படுகொலை!"
என்றே இனியும்
அரசியல் நடத்துவதற்காகவாவது
விட்டு விடச்சொல்லுங்கள்
எங்கள் சகோதரர்களை!

இன்று,
தங்களைத் தாங்களே
மாய்த்துக்கொள்பவர்கள்,
மாற்றி யோசிக்க நேரம் பிடிக்காது!

என்னை நனைத்த மழைத்துளிகள்

2011-08-24T23:09:00.000-07:00

தேங்கிய நீரை
வாரியிறைத்தபடிதான்
வாகனங்கள் நகர்கின்றன
இருந்தும் குறைவதாயில்லை
மழைநீர்க் குட்டை!

சவ ஊர்வலம்போலதான்
போக்குவரத்து ஊர்ந்து செல்லும்
ஊர்வலத்தின் முன்னே
உண்மையிலேயே
செத்துக்கிடந்தாலும் கிடக்கும்
எதாவது அரசு பேருந்து!

தேரைகள், பாம்புகள், எல்லாமே
சொல்லாமல் கொள்ளாமல்
வந்து குடியேறும்
கண்ணுக்கு அகப்படாத மூலைகளில்...
வாடகை பயம் போல!

வானம் பார்த்த பூமிகள்
கிச்சுக்கிச்சுமூட்டிய
மழைத்துளிகளால்
புல்லரித்து நிற்கும்
பசுமையோடு!

2011-08-24T06:51:00.000-07:00

என் சமாதானத்தை
கேட்டுக் கேட்டுப் பழகிவிட்டது
என் மனதுக்கு;
எனக்காகவே
சமாதானமானதுபோல
நடிக்கவும் கூட...
இன்னமும்
நடிக்கப் பழகாத அவளுக்காகவே
நானும் என் மனதும்
ஒவ்வொரு நொடியும்!

2011-08-24T02:47:00.001-07:00

சிவப்பை பச்சையென்றது
மஞ்சளை ஊதா என்றது
மூன்று விரல்காட்டி ஐந்தென்றது
நாளைக்கு வந்தேனென்றது
மூக்கைத் தொட்டுக் கண்ணென்றது...
தப்புத்தப்பாகச் சொன்னாலும்
அதிசயித்துக் கைதட்டும்
அப்பாவைப் பார்த்து
கைகொட்டிச் சிரித்தது குழந்தை!

2011-08-24T02:45:00.001-07:00

என்னை வழிநடத்தும்
கைத்தடியின்
முனை பற்றிய கரத்தில்
மெலிதாய் கிளம்பிய நடுக்கத்தில்
அவளிடம்
காதல் கடிதத்தை நீட்டிய பொழுது
மீண்டும் மலர்ந்தது!

2011-08-24T02:43:00.000-07:00

சுள்ளென்று அடிக்கும் வெயிலும்
இதமாயிருக்கிறது
சோவென்று கொட்டிய மழைக்குப்பின்!

2011-08-24T02:21:00.001-07:00

மிகுந்த எச்சரிக்கையுணர்வோடு
சிந்தித்துத் திட்டமிட்டு
திரும்பவும் அது நடக்காமல்
மனதை
பக்குவப்படுத்தியே வந்தாலும்
ஏதோ ஒரு நொடியில்
எனை மறந்த சிந்தனையில்
கடித்தே விடுகிறேன்
உதடு தீண்டும் மீசையை!

2011-08-22T01:47:00.001-07:00

புதிதாக பல்முளைத்த குழந்தையாக
ஒவ்வொரு விடியலிலும்
புன்னகைக்கும் புல்வெளி!

2011-08-19T04:17:00.001-07:00

வளையல்கள் கழண்டு விழுவது தெரியாமல்
விளையாடியபடி
எனைத் தொடர்ந்தது தூறல்!

2011-08-16T03:56:00.001-07:00

எண்ணிலடங்கா வாகனங்கள்
கடந்துகொண்டேயிருக்கின்றன
எந்த வண்டும் வரவில்லை;
சாலையோரப் பூச்செடிகள்!

2011-08-12T02:42:00.001-07:00

மதுப்புட்டிகள்
அழகாக அடுக்கிவைக்கப்பட்டுள்ளன
உருண்டு புரண்டபடி சாலையில் குடிகாரன்!

2011-08-11T05:49:00.000-07:00

மழைக்காலத்தின் நீர்க்குட்டையில்
இறங்கிய கால் பற்றி
மேலேறிவந்தன...
மூழ்கிக்கிடந்த சேறும் சகதியும்!

வெற்றிலை!

2011-08-09T04:02:00.001-07:00

குளித்ததுமுடித்து, தலைசீவி
முகப்பூச்சு பூசி,
பொட்டுவைத்து, பூ வைத்து
அலங்காரமாய் வீதியில் திரிகிறது...
பீடாக்காரனுக்கு வாக்கப்பட்ட
வெற்றிலை!

எங்கம்மா...

2011-08-09T04:00:00.001-07:00

படிப்புக்குப் பணம் கட்டும்போதெல்லாம்
கடைசி நாள்வரை காத்திருப்பது
நானாக மட்டுமேயிருப்பேன்...
தவறாமல் நடக்கிறது,
எங்கம்மாவிற்காக
பள்ளியில் நான் அடிவாங்குவதும்
எனக்காக எங்கம்மா
முதலியாரிடம் திட்டு வாங்குவதும்!
எங்கம்மாவால் திட்ட முடிவதில்லை,
தையற்கூலி தருவதற்கு
நாள் தவறியவர்களை!

2011-08-09T03:58:00.001-07:00

எத்தனை முறை
சில்லரை திருடினாலும்
தினமும்
சில்லரையோடுதான் தொங்கவிடப்படும்
அப்பாவின் சட்டை!

2011-08-09T03:57:00.000-07:00

பிடிவாதமாக
எங்கோ பார்த்துக்கொண்டிருக்கிறாள்
அவன் கவனிக்காத நிமிடங்களில்
கவனிக்க மறப்பதில்லை ஓரவிழிகள்...
அவளது
மவுனச்சுமையின் பாரம் தாங்காமல்
வழியும் வழிபார்த்து
விழிமுட்டி நிற்குது கண்ணீர்
துடைத்துவிட
நெருங்கி வருவானென்ற நம்பிக்கையில்...
எந்நேரமும் உடைக்கப்படலாம்;
தற்போதைக்கு
சுமையை இவனும் பகிர்ந்தபடி!

இது ஷாப்பிங் காலம்!

2010-12-04T05:49:00.000-08:00

அத்தனை கூட்டத்திலும்
நாலைந்துமுறை ஏறியிறங்கி
மனைவியின் மனசுக்கேத்த
மசக்களி கவுன் முதல்
சொடக்கு கிளிப்புவரை
குழந்தையின் குதூகலத்திற்காக
ரிமோட் கார் முதல்
பாட்டுப்பாடும் பொம்மைவரை
வாரிச்சுருட்டி வீடு திரும்புகையில்
அத்தனை வாங்கியும்
வாங்க மறந்த
இலவச கட்டைப்பைக்காகவும்
சோப்புக்குமிழுக்காகவும்
பின்னிருக்கையில் சிணுங்கியபடி
மனைவியும், குழந்தையும்!

நான் பச்சை விளக்குக்காரி!

2010-12-04T05:47:00.000-08:00

நான்

24 மணி நேரமும்
பச்சை விளக்குதான்
பிறகெதற்கு
சிவப்பு விளக்கென்றாய்?
அபயம் தருகிறேன்;
என்னை அபாயமென்றால் எப்படி?

தோல் போர்த்திய சதைகள்
தினம்தினம்
சதை பேசிச் செல்கின்றன;
சில
தாழ்வுணர்ச்சிச் சதைகள்
பாரத்தை என்மேல் கொட்டி
பாரமாகின்றன;
போதை நாற்றமெடுத்தவையோ
வெறிநாயாய் குதறியெடுத்து
குப்புறக் கவிழ்கின்றன!

என்
சதை தழுவும் விரல்களில்,
நகக்கீறல்களில்,
இன, மத
அடையாளம் தெரிந்ததில்லை!
வலியின் அலறலுக்கு
எவனும் அர்த்தம் தேடியதில்லை!
தீண்டாமை கூட
தீண்டியதில்லை!
பெருமையாகச் சொல்ல
வேறொன்றுமில்லை!

வேண்டாத நகம்போல
வெட்டியெறிய முடியாமல்
கர்ப்பப்பை;
உணர்ச்சி, வெட்கம், உச்சம்
எதுவுமே உற்பத்தியாகாத உடல்;
பலநூறுமுறை
கூடிக் கலந்தாலும்
ஒருநாளும் உணர்ந்ததில்லை
மணப்பெண்ணாய்!

தானத்தில் சிறந்தது
அன்னதானம்,
கண்தானம்,
உடல்தானமென்று
பெருமையளக்கிறாய்,
உயிரோடு
உடல்தானம் செய்யுமென்னை
பெண்ணாகப் பார்க்கவே
அருவறுக்கிறாய்!

பேருதான்
உடலுழைப்புத் தொழிலாளி;
விடுமுறையில்லை,
நேரகாலமில்லை,
என் பூமியின்
சுற்றுப்பாதை முழுதுமே
விடியாத இரவாகவே!

சட்டம்
தவறென்றும் சொல்லுது,
பாதுகாப்பும் தருது;
என் இருட்டறையில்
துகிலுறியும் துச்சாதனனும்
கிருஷ்ணனும்
கூட்டுக் களவாணிகளே!

பாரம்பரியமிக்க என்னை
தேவதாசியென்கிறாய்,
பரத்தையென்கிறாய்,
வேசியென்கிறாய்,
விபச்சாரியென்கிறாய்;
இன்றுவரை
வந்துசெல்லும் உன்னை
என்னவென்றழைப்பேன்?

என் அவள்...

2010-12-04T05:41:00.000-08:00

எதேச்சையான சந்திப்பு அது...

கனவின் தேவதையாக

அவள் வருவதற்காகவே

தூக்கத்தைத் தூங்கவிடாமல்

செய்த கணங்களை

இன்றெண்ணிப் பார்க்கிறேன்...

எத்தனையோ பேரின் ஏக்கத்திற்கு நடுவே

அவளோடு நடந்தே கடந்த தூரம்

இப்போது நினைக்கையிலும்

மலைப்பாயிருக்கிறது...

கிண்டல், கேலி மட்டுமே

உற்பத்தி செய்து

மறுநொடியே சுவைத்து மகிழ்ந்தபடி

நகர்ந்த அந்நாட்களில்

விடாமல் துரத்திய இயலாமை

இறுதிவரை மலரவிட...

குழந்தையும் பொம்மைகளும்

2010-12-04T05:38:00.000-08:00

என் மகள்

டீச்சராக மாறியபோது

மாணவர்களாக

வேடமிட்டன பொம்மைகள்!

டாக்டராக மாறியபோது

நோயாளிகளாகி

வைத்தியம் பார்த்தன!

அம்மாவாக மாறியபோது

குழந்தைகளாகி

சொன்ன பேச்சு கேட்டன!

விளையாடிய களைப்பில்

தூங்கி விட்டாள் மகள்!

சுற்றிலும்

விழித்தபடி பொம்மைகள்...

அடுத்து என்னவாக

ஆவதெனத் தெரியாமல்!

வாழ்வின் விபத்து!

2010-12-04T05:36:00.000-08:00

விபத்திலடிபட்ட உடலின்

சிதைந்த மூளைச்சிதறல்களில்
இறந்துபட்டிருந்தது
வருங்காலக் கனவுகளும்
குடும்ப எதிர்பார்ப்புகளும்;
கட்டியழக்கூட
அடுக்கிக் கோர்த்தால்தான்...
ஆகப்போவது ஏதுமில்லை
கூடியிருக்கும் கூட்டத்திற்கு;
எட்டியெட்டிப்பார்த்து
உச்சுக்கொட்டி,
ஒருசில தலைகிறுகிறுத்து
நகர்ந்தபடி...
அள்ளிச் செல்லுகையில்
கசியுது ரத்தம்
குழந்தைகள் நினைவால்!

குப்பை நகர் காசி!

2010-08-11T05:26:00.000-07:00

எங்கெங்கு காணினும் சவமாய்...

கேட்டால் சொல்கிறார்கள்
சிவதலமாம்!

பிணமும்
ஊறிப் பிய்ந்த ஊனுமாய்
புண்ணாகிய புண்ணிய கங்கை!

அஸ்தி கரைப்பதும்
ஆன்மீகக் குளியலும்
அதே படித்துறையில்!

மோட்சத்தை எதிர்நோக்கி
காத்திருக்கும் முதுமைகள்
இந்நரகத்தில்!

பாதை விசாரிப்பதுபோல்
பெட்டிக்கடையெங்கும்
போதை விசாரிப்புகள்!

முகம் மறைக்கும் விபூதி
விகாரம் உடுத்திய
அகோரிப் போதைவாசிகள்!

புலன் மயக்கத்தில்
சவந்திண்ணும் மூடன்
சிவனின் அவதாரமாம்!

மதம் பிடித்த
மாசு படிந்த
மாசுக் கட்டுப்பாட்டு வாரியம்!

அரசாங்கச் சட்டமெல்லாம்
செத்து மிதக்குது
பிணத்தோடு பிணமாய்!

போதையைத் தடுங்கள்;
புண்ணியமாப்போகும்
பாவம் சுமக்கும் காசிக்கு!

வறுமை!

2010-08-05T22:40:00.000-07:00

வேற்றுக்கிரகத்திலல்ல,

என்னுலகில் தான்
இவர்களும்!

பூமிக்கு இருதுருவமென்று படித்திருக்கிறேன்
தவறு
இரு உருவங்கள்!

உடல் இளைத்த நாகரீகமும்
மறுபுறம்
உடல் இளைக்கும் நாகரீகமும்!

உலகம் சுருங்குகிறதாம்;
உடற்சுருக்கங்கள் சிரிக்கின்றன
எனைப் பார்த்து!

வறுமை தான்
தின்று கொண்டிருக்கிறது...
தினம் இவர்களை!

இனி
சிதறும் உணவுப் பருக்கைகளில்
இவர்கள் முகம் தெரியட்டும்!

படமெடுத்தவர்களைப் பார்த்தால்
கேட்க வேண்டும்
உணவளித்தீர்களா என்று!

ஆலஞ்செடி

2010-08-05T22:22:00.002-07:00

யாருமற்ற கட்டிடத்தில்
பேச்சுத்துணைக்காக வளருது
ஆலஞ்செடி

வாழ்வின் எச்சமாய் கட்டிடம்
எச்சத்தின் வாழ்க்கையாய்
ஆலஞ்செடி

கட்டிடத்தை
கெட்டியாகப் பற்றியிருக்கிறது
கட்டிடத்தையும் சேர்த்து

ஆணியடிக்கக்கூட யோசித்திருப்பார்கள்
இப்போது
ஆணிவேர் பிடுங்க ஆளில்லை

கட்டடத்திற்கான பஞ்சாயத்து
வளர்ந்த இச்செடி நிழலிலும்
தொடரலாம்

கட்டிடத்தின் மனித நினைவுகள்
இன்றும் பசுமையாய்
ஆலஞ்செடிபோல்!

புகையும் அடுப்படி!

2010-08-05T22:22:00.000-07:00

நள்ளிரவு வானமாய்
கரிப்பிடித்த அடுப்படிகள்
விடிஞ்சு போச்சு!

திரிகையும், அம்மியும்
உரலும், குழவியும்கூட
உருமாறிப்போச்சு!

புகைக்கூண்டுகளும்
உசுப்பேத்தும் ஊதுகுழலும்
ஒழிஞ்சே போச்சு!

சமையல் வெந்ததை சத்தமிட்டு
சமையலே சொல்லும்
காலம் வந்துடுச்சு...

"இன்னுமா ஆகல?"
அதட்டுவது ஆணாகவும்
"இதோ ஆயிடுச்சு!"
படபடப்பது பெண்ணாகவும்
இன்னும் அப்படியே!

காமராஜர் என்றொரு அரசியல்வாதி!

2010-08-05T22:21:00.000-07:00

நான் பிறக்குமுன்பே இறந்துபோன
காமராஜரைப் பற்றித்தான்
இன்றுகூட என் அப்பா
பெருமை பேசிப்பேசி
மாய்கிறார்!

ஒரு பினாமி இல்லை
புறம்போக்கு நிலமுமில்லை
பள்ளி கல்லூரி
எதுவுமில்லை
பட்டாசு கொளுத்திப் போடக்கூட
பட்டாளமில்லை!
பிறகெப்படி நம்புவேன்
இவர் அரசியல்வாதியென்று!

இவர் படிக்காத மேதையாம்!
அரசியலிலிருந்தும்
ஒரு டிகிரி கூட 'வாங்க'த் தெரியாத
இவர் அரசியலில் பேதையென்பேன்!
மதிய உணவு கொடுத்து
பள்ளிக்கு அழைத்தாராமே பிள்ளைகளை?
படிக்காத கூட்டமிருக்கும்வரையே
பதவி நிலைக்குமென்ற
அரிச்சுவடி கூட தெரியாத
இவரெல்லாமா அரசியல்வாதி?!

ஒருமுறை கூட
திருமணமாகவில்லை
வாரிசும் இல்லை
சொத்துமில்லை, பத்துமில்லை
சொந்தபந்தத்திற்கு
ஒரு பதவியுமில்லை!
இவரைப் போய்
"கிங் மேக்கர்" என்கிறார்கள்!

இன்றோ
இவர் ஆட்சியை அமைக்க
கோஷ்டிகளுக்குப் பஞ்சமில்லை
கொள்கையைப் பின்பற்றத்தான்
எவருமில்லை!
இவரணிந்த கதராடையை,
பாதயாத்திரை பக்தர்களின்
சீருடைபோல்
அவ்வப்போது மட்டுமே அணிகிறார்கள்
அடையாளத்திற்கு!

என் அப்பாவிடம் சொன்னேன்
இவர் அன்று
ஒருமுறைதான் தோற்றார்...
இன்றுவரை இருந்திருந்தால்
எல்லாத் தேர்தல்களிலும்
சொல்லிவைத்தாற்போல்
தோற்றுக்கொண்டே இருந்திருப்பார்!
விருந்து வைக்கத்தெரிந்தும்
'மருந்து' வைக்கத் தெரியாத
இவர் அரசியல்வாதியல்ல,
அரசியல் அப்பாவி!

ஆறாவது அறிவு!

2010-06-18T01:57:00.001-07:00

மூன்று நாளுக்குமேல்
என் வீட்டில் தங்கிய பெற்றோர்களால்
முகம் இறுகியபடி சுற்றிவரும்
வீட்டு உரிமையாளரின் கண்களில் மட்டும்
கரப்பானும், பெருச்சாளியும்,
குடும்பத்தோடு குடியேறிய பூனையும்,
மழைநேரத்தில் வந்துபோகும்
அரிப்புழுவும், அட்டைப்பூச்சியும்
இதுநாள் வரை சிக்கியதேயில்லை!

இலவசமாய்!

2010-06-18T01:56:00.001-07:00

"இருக்கிறவங்கல்லாம் கையத் தூக்கு!"
யாரோ கேட்டதுபோல்
கைதூக்கிப் பெருமை பேசிய
மொட்டை மாடிகள்...
விடிவெள்ளிக்காக
இரவெல்லாம் காத்திருந்து
விடிந்த பொழுதில்
கூடுதலாய் காட்சியளித்த
ஒரு பாடலை ஒரு வாரம் முழுக்க
பேசிக் களித்த என் மூஞ்சியில்
ஒன்றரை டன் வெயிட்டான குத்துவிட்டு
ஐந்து நிமிடத்திற்கொருமுறை
அலறிக் குத்தாட்டமிட்டு
காட்சியளிக்குது நடுவீட்டில்!
போக்கிய பொழுதுகளை
ஆக்க முடியாத அவஸ்தையில்
அவ்விடம் அகன்று வாசல் திறந்தால்
இன்னொன்று இளித்து நிற்குது
இலவசமாய்!

அரிதார புருஷர்கள்!

2010-06-18T01:55:00.001-07:00

கிழிந்து கந்தலான
நிர்வாணச் சாலைகள்
அவசர அவசரமாக
ஆடையணிந்து கொண்டன

சாலை நடுவே
பொறிக்கக் காத்திருந்த
கொசு முட்டைகளோடு
திறந்து கிடந்த
கழிவுநீர்ச் சமாதிகள்
கல் போட்டு மூடப்பட்டன

முகத்தில் பிளீச்சிங் பவுடர்
பூசிய மூத்திரச்சந்து
பளிச்செனச் சிரித்தது
வழிநெடுக

தங்க நகைகளின்
விலையேற்றம் பற்றி
சற்றும் கவலையின்றி,
நாய்ச்சங்கிலி மாட்டிய தலைகள்
டிஜிட்டலில் சிரித்தன
வரிசையாய்

பேனருக்குக் கீழே
காவலிருக்கும் காக்கிகள்
காத்திருந்தன
எந்நேரமும் கடக்கவுள்ள
கார்க்கண்ணாடிக்கு
விறைப்பான வணக்கம் சொல்ல

வெறிச்சோடிய சாலையில்
சைரன் ஒலிக்க
வெறிபிடித்தோடிய வாகனம்
கையாட்டியபடி
கணநேரத்தில் மறைந்தது...
மீண்டும் குப்பையானது சாலை!

கொஞ்சம் கவிதை!

2010-04-27T06:42:00.000-07:00

புள்ளிகள் புணரப் புணர
பிறந்துகொண்டேயிருக்கிறது
கோடு!
----------------------------------

தேரோட்ட நெரிசலில்
சாமி பார்த்த சந்தோசம்...
சிக்னலில்
பச்சை விளக்கைப் பார்க்கும்போது!
----------------------------------

எதிர்வீட்டுத் தொலைக்காட்சிச் சத்தம்
இன்றும் உச்சத்தில்...
இறுதியில் குறைந்தது
விசும்பல் ஒலி!

சோளக்காட்டு பொம்மை!

2010-04-27T06:41:00.001-07:00

வேளாவேளைக்குச் சாப்பாடு
போதுமான சம்பளம்
பேட்டா, போனசு
எதுவும் கேட்டதில்லை...
எங்க சின்னைய்யாவின்
பழைய உடுப்பை மாட்டிக்கொண்டு
வறுமையைக்கூட
விரட்ட முடியாமல்
வயக்காடே கதியாயிருக்கிறது
சோளக்காட்டு பொம்மை!
"அங்க என்னலே வேடிக்க?
வெரசா வேலயப் பாரு, மொதலாளி வராரு!"
இது எங்கப்பன்!

இயற்கை

2010-03-19T00:22:00.000-07:00

பனித்துளி கனக்கிறது...
விடியும்வரை வியர்த்துக்கொட்டியபடி
புல்வெளி!

சில்லரை

2010-03-19T00:13:00.000-07:00

சிக்னல் விலகுமுன்பே
கைக்குழந்தையுடன்
என்னை நெருங்கிய
பிச்சைக்காரியின்
தவிப்பைவிடப் பெரியது
பையில் சில்லரையில்லாத
என் தவிப்பு!

வயக்காடு வாழ்த்துகிறது!

2010-01-15T04:00:00.000-08:00

மாடு கட்டிப் போரடித்தால்
மாளாது செந்நெல்லென்று
யானை கட்டிப் போரடித்த கூட்டம்
இன்று
வீடு கட்டிப் போரடிக்கிறது
என் மேல்!

வயலும்
வயல் சார்ந்ததும் மருதம்...
தொழிலும்
தொழில் சார்ந்தோரும்
பிழைக்க
என் வயிற்றில்
'பாலை" வார்ப்பது
என்ன நியாயம்?

வறண்ட கோடுகளால்
இயற்கையன்னை வதைப்பது போதும்:
இல்லாத கோடுகளால்
தண்ணீர் இல்லாமல் செய்வது
என்ன கொடுமை?
அணைக்கட்டுகள்
என்னை அரவணைக்காததை
என்னவென்பது?
மொழிகளால்
பிரிந்த உங்களிடம்
எந்த மொழியில் வேண்டுவது?
என்னிடம்
ஆழப்பாய்ந்து நீரள்ளிப் பருகும்
வேரில்லை:
நீர்த்தாகம் தீர
உங்களை விட்டால்
கதி வேறில்லை!

பசுமை தந்தேன்
இன்று
சுமையாகிப் போனேன்!
என்னை
வருடிச் சென்ற தென்றல்
நெருடலாய் கேட்கிறது
ஏன் கம்பிகளாய்
மாறி வருகிறாயென்று!

ஏரு பூட்டி சேறு பூசி
என்னை
கிச்சுக்கிச்சுக்காட்டி
விளையாடிய நீங்களா
இன்று
உயிருடன் பிரேதப்பரிசோதனை செய்வது?

பெற்றவள் கைவிட்டாள்...
பெற்றவனோ
விற்றுவிற்று வெற்றிடமாக்கி
மீண்டும் விற்றுவிட்டான்!

இன்னமும் இருக்கிறேன்...
ஊருக்கு ஒதுக்குப்புறமாய்
சுடுகாடு இடுகாடுபோல்
தீண்டத்தகாத வயக்காடாக!

ஒரே ஆறுதல்:
பொங்கல் பண்டிகையை
இன்றுவரை
பெயர் மாற்றவில்லை...
செங்கல் பண்டிகையென்று!

அதிபர்களின் அரசாங்கம்

2009-12-08T18:10:00.001-08:00

உரிமை கேட்ட கூட்டத்தை
கொன்று தின்றதுபோக
மிஞ்சியதை
காலுடைத்து, கையுடைத்து
முள்வேலிக் கொட்டிலுக்குள்
சாகடிக்கும் அரசாங்கம்!
உச்சுக்கொட்டும் ஐநா சபை
விசாரிக்க வக்கற்று
வக்காலத்து வாங்குது
"பேஷ்! பேஷ்!" என்று!

சீனா, பாகிஸ்தானோடு
போட்டி போட்டு
ராணுவ பலத்தையெல்லாம்
கூட்டிக் கொடுத்த
கூட்டுக் களவாணி இந்தியா
கோடிகோடியாய்
கொட்டிக் கொடுக்குது...
இன்னும் புடுங்கப்போவதாய்
பேசித் திரியுது!
கண்ணி வெடிகளைப்
புடுங்கப்போவதாய் பேசித் திரியுது!
காஷ்மீரில்
எல்லை தாண்டிய தீவிரவாதமென்றால்
காலடியில்
ஈழத்தமிழரை கொன்றொழிப்பது
பௌத்த காருண்யமா?!

தன்னாட்டு மக்களை
கொன்றொழித்த பாவத்தை
திருப்பதி உண்டியலில்
கொட்ட வந்தவனுக்கு
அதிரடிப் பாதுகாப்பு!
அப்பாவி மீனவருக்கோ
துப்பாக்கிச்சூடு தான்
தினசரிப் பரிசு!

வரி ஏய்ப்பு செய்பவர்கள்
வருமானம் பெருக்க
'வடக்கின் வசந்தம்" வீசுது!
தொழிலதிபர் துயர்நீக்க
நற்சான்றிதழ் கொடுப்பதற்கே
இன்பச்சுற்றுலா சென்றுவந்தது
எம்பிக்கள் குழு!

இனி
சன் நெட்வொர்க்கில்
சிங்களமும் சேரும்!
குடும்பத்துக்கொரு
அமைச்சர் பதவி கேட்டு
கொழும்பிலும் கொட்டமடிக்கும்!
'பட்சே" சகோதரர்களுக்கு
'கொலைமாமணி"
விருது கொடுத்து குதூகலிக்கும்!

எதையோ சாதித்ததற்காக
நாளொரு பட்டமும்
பொழுதொரு பாராட்டுவிழாவுமாய்
சுற்றித் திரிபவர்
உலகத் தமிழ் மாநாட்டில்
ஒருவேளை அறிவிக்கலாம்...
ரகசிய முகாம் பற்றி
ஏதோவொரு வாரப் பத்திரிக்கையில்
படித்துப் பதைபதைத்ததாய்!
செம்மறித் தமிழறிஞர் கூட்;டம்
மன்னிக்கவும்,
செம்மொழித் தமிழறிஞர் கூட்டம்
'உச்சு"க் கொட்டி உருகலாம்!

உறவுகள்

2009-12-07T10:07:00.000-08:00

அவரைப் போலொரு அப்பா;
இவரைப் போலொரு அம்மா;
அவனைப் போலொரு மகன்;
ஏங்கச் செய்யும் உறவுகள்
எதிர்ப்படும் வேளைகளில்
பிறவிப்பிழை
இலைவிட்டுக் கிளைவிட்டு
விருட்சமாய் விரியும்;
உறவுகள்
தேடிக் களைத்த வேர்கள்
ஓரிடத்தே நிலைப்பெற,
எங்கிருந்தோ வந்தமர்ந்த
ஏக்கப் பறவைகள்
சற்றே இளைப்பாறி,
கலைந்து செல்லும்
கனிசூழ் விருட்சத்தின்
உறவு தேடி!

கனவுகள் தொலைப்பவன்!

2009-11-15T18:41:00.000-08:00

நான் தேடிக்கிடைக்காத நிம்மதி
என்னைத் தேடிவரும் வரம்
கனவு!
ஒவ்வோர் இரவிலும்
சில
கனவுகளைத் தொலைத்துவிட்டுத்தான்
விழிக்கிறேன்
கசங்கிய படுக்கையை
உதறிவிட்டு மடிக்கும் போதும்
அகப்படுவதில்லை!

அள்ளக்குறையாத
தங்கக்குவியலை
ஏறிமிதித்து
சரித்து விளையாடுகையில்
கடித்த கொசுவை
நசுக்கும் நொடியில்
கனவு தொலைத்த சோகத்தை
யாரிடம் சொல்வேன்?!

உறக்கத்தின் பயணத்தில்
சிலநேரம் வானவில்லாய்
சிலநேரம் கானலாய்
எல்லாமே கணநேரமே!
ஆம்
அதிகபட்ச ஆயுசே
20 நிமிடம் தானாம்...
குறும்படம் போல்!

மனதை அரித்த நினைவுகள்
எக்கச்சக்க அச்சுப்பிழையுடன்
மறுபிரசுரமாவதை வியந்திருக்கிறேன்!
புகைப்படத்தில் சிரிக்கும் அப்பா
எப்போதாவது பேசிச் செல்வார்...
சாவின் வலியை
அவர் சொன்னதில்லை
வரும் வழியை
நான் கேட்டதுமில்லை
பேசிக் கொள்வோம்
வழக்கம்போல்
இன்றைய செய்தியையும்!

ஆசை முளைத்த நாள்முதலாய்
உறவு களைந்த உறவும்
வயது மரத்த மனமும்
காலம் கடந்த காலத்திலும்
உறுத்தாமல்...
நிறுத்தாமல்...
இந்திரனுக்கு இணையாக!
யார் தடைபோட்டது
கனவுக்கன்னியென்று?!

ஒற்றைக்கொம்பு சிறுத்தை
தொற்றிப் படரும் தென்னை
வற்றிய கிணற்றில்
தலைகுப்புற விழுந்தும்
அடிபடாத நான்!
இப்படி
எத்தனையோ ஆச்சர்யங்களை
அடுக்கலாம்...
என் கனவு அருங்காட்சியகத்தில்!

மன்னிக்கவும்
இதைப் பார்வையிட
என்னைத் தவிர
யாருக்கும் அனுமதியில்லை...
உங்களுக்காக
பயணக்கட்டுரை எழுதுவேன்
படித்துச் செல்லுங்கள்
யாரேனும் பிரசுரித்தால்!

பிரிக்கப்படாத புத்தகங்கள்

2009-08-20T18:48:00.000-07:00

வாடகை வீடு மாறியதும்
புத்தகங்களை
அலமாரியில் அடுக்குவதில்
அதிக ஆர்வம்...
பெரும்பாலும்
மூளைக்கொத்துக்கிடையே
இடம்பிடிக்காத
பிடிக்காத புத்தகங்களே!

அடுக்குகளில் சில
பரிசாக வந்தவை:
பல
கட்டாயம் படித்தாகவேண்டி
வாங்கியவை:
விரும்பி வாங்கிய
ஒன்றிரண்டு மட்டுமே
என் கைரேகைகளை
அவ்வப்போது பதியமிட்டபடி!

ஒருசில புத்தகங்களை
நான் தொட்டதேயில்லை
குழந்தைகளையாவது
தொட விட்டிருக்கலாம்...
என் வீட்டுக் கறையானுக்கும் கூட
இதே வருத்தம்தான்!

கல்லூரிவரை கால்பதித்தும்
அடையாளமாக
அடுக்கில் ஏதுமில்லை!
ஆம்:
புத்தகங்கள் மீதான
சிறிதான ஆர்வமும்
அற்றுப்போக விருப்பமில்லை!

அறிவுசார் புத்தகங்கள்
வாங்கும் பழக்கம்
அதிகரித்துள்ளதாக
கேள்விப்பட்டிருக்கிறேன்
படிக்கும் பழக்கமும்
பெருகியுள்ளதாக
எதிலும் படித்த நினைவில்லை!

என்றாவது ஒருநாள்
படிக்கும் ஆர்வம் வரும்...
என் பேரனுக்காவது!
அன்றுவரை
கல்வெட்டுக்காக
கால்கடுக்க நிற்கும்
தலைவர்கள் சிலைபோல்
புத்தகங்களை
அடுக்கிக்கொண்டே!

உன் நினைவுகள்!

2009-08-18T10:48:00.000-07:00

மழை ஓய்ந்த பின்னும்
மரத்தடியில் சொட்டும் இலைநீராய்
அவ்வப்போது உன் நினைவுகள்!
இரவின் அமைதி கிழித்து
கடித்துக் குதறும்
நாய்களின் இரைச்சல்
மனதினுள் ரணமாக...
தூரத்து விளக்கு வெளிச்சத்தை
துரத்தும் ஈசல்கள்;
சில
இறகுகள் முறிந்து
உயிர் வடிந்தபடி
முடமான நம் உறவாய்!
திருப்பத்தில்
நீரை வாரியிறைத்த வாகனம்
நனைந்த சட்டையை
மீண்டும் நனைத்தது...
இனியொன்றும் ஆகப்போவதில்லை
இருந்தும்
நம்பிக்கை மட்டும் துளிர்த்தபடி...
ஒவ்வொரு
மழை இரவின் விடியலிலும்!

இது எங்க சுதந்திர தினம்!

2009-08-15T02:20:00.000-07:00

இது
முதலாளிகள் மாற்றத்தை
அடிமைகள் கொண்டாடும்
திருநாள்!

குண்டு துளைக்காத
கண்ணாடி கூண்டுக்குள்
வீராவேசமாக பிரதமர்!
வேடிக்கை பார்க்கும்
வெளிநாட்டுத் தலைவர்கள்!
பதட்டத்துடன்
பட்டொளிவீசிப் பறக்கும்
தேசியக்கொடி!

உணர்வு கொப்பளிக்க
கொடியட்டையை
சட்டையில் குத்துமுன்பே
காவி மேல் வருமா?
பச்சை மேல் வருமா?
என்ற குழப்பம்
மனதை "சுருக்"கென்று குத்தும்!
ஆண்டுக்கு இருமுறை மட்டுமே
தொங்கவிடும்
அடையாள அட்டையல்லவா?!

இலவசமாக
வம்பளந்த குறுஞ்செய்தி…
இன்று மட்டும்
தேச பக்தர்கள்
அம்பானி, டாட்டா,
ஏழ்மையை விரட்ட
இருபத்தைந்து பைசா
பிடுங்கப்படும்!

பள்ளிகளில்
சாலையோரங்களில்
கொடியேற்றுமிடமெல்லாம்
இனிப்பு மிட்டாய்க்காக
கத்திருக்கும் குழந்தைகள்!
காந்தி நோட்டுக்களால்
கோட்டை பிடித்தவர்கள்
கொடியேற்றி
காந்தியின் பெருமை பேசி
கையாட்டி விட்டு
காரிலேறிச் சென்றபடி...
அடுத்த ஊரில் பெருமை பேச!

விடுமுறையை முன்னிட்டு
தாமதமாக எழுமுன்னே
தேசபக்திப் பாடல்களை
முடித்துவிட்டு
நமீதாவுடன் ஒருநாளைச்
செலவிடத் தொடங்கும்
உலகத் தொலைக்காட்சிகள்!
குடும்பமே
தொலைக்காட்சி முன்னே
தவமிருக்க...
தலைவி மட்டும்
சுதந்திரமின்றி
அடுக்களைக்கும் இங்குமாய்
அலைபாய்ந்தபடி!

நட்புக்காக... சில வரிகள்!

2009-08-02T18:52:00.000-07:00

அம்மா அறிமுகம் செய்த
முதல் சொந்தம்
அப்பா ;
அடுத்தடுத்து
புதுப்புதுச் சொந்தங்கள்
அறிமுகமானபடியே...
சொத்துக்கள் குறுக்கிட
உறவுகளில் உரசல்கள்...
ஒட்டுப்போட்ட விரிசல்கள்!
அதிசயமாய் நம் நட்பில்
இன்றுவரை
சிறுகீறலும் இல்லை...
ஆம்;
உன்னை
எனக்கு அறிமுகம் செய்தது
நானல்லவா?!

எனக்குச் சரியாக
நீச்சலடிக்கத் தெரியாது...
குறிபார்த்து
பம்பரம்விடத் தெரியாது...
பேட் பிடிக்கத் தெரியாது...
மூச்சுவிடாமல்
கபடி பாடத் தெரியாது...
எப்படியிருந்தாலும்
பழனியின் அணியில்
கண்டிப்பாக நான் உண்டு!
ஆம்;
எங்கள் நட்புக்கு
எங்களைப் பிரிக்கவும் தெரியாது!

எதிர்காலம் பற்றி
எத்தனையோ பேச்சுக்கள்...
எம்எஸ் டோனி முதல்
எதிர்வீட்டு வாணிவரை
எத்தனையோ கிசுகிசுக்கள்...
அத்தனையும்
பேசிக் களைத்து
வீடு திரும்புகையில்...
எதிர்ப்பட்டாள் மாலதிமாமி!
அடித்துக் கொண்டது மனது
'சே! இவளப்பத்தி
சொல்ல மறந்துடுச்சே!"

அவரவர் வீட்டிலிருந்து
வாங்கிவந்த
வாழ்த்துகளை
பகிர்ந்து கொண்டோம்
எங்களுக்குள்;
'ஊர்சுத்தக் கௌம்பியாச்சு!"
'நீ உருப்புட்ட மாதிரிதான்!"
'எக்கேடு கெட்டாவது போ!"
இன்றுவரை
வார்த்தைகள் கிடைக்கலையாம்...
நட்பைப் பாராட்ட!

இதற்குத்தானே ஆசைப்பட்டீர்கள் அப்துல்கலாம்!

2009-05-28T20:21:00.000-07:00

டென்மார்க் உள்ளிட்ட ஐரோப்பிய நாடுகள் எவ்வளவோ முயற்சித்தும் இலங்கை பிரச்சனையில் யாராலும் மூக்கை நுழைக்க முடியவில்லை! ஈழத்தமிழர்களை நாங்கள் பார்த்துக் கொள்(ல்)வோம்... அவர்கள் செத்தாலும் பிழைத்தாலும் யாரும் கவலைப்படத் தேவையில்லை என்று சொல்லாமல் சொல்லிவிட்டது இந்திய வல்லரசு!

ஈராக்கினுள் நுழைந்த அமெரிக்காவின் ஆதிக்க வெறிக்கு சற்றும் குறையாமலும், உலக நாடுகளை தனது கைக்குள் போடும் விவேகத்திலும் சற்றும் அசராமலும் தான் நினைத்ததை சாதித்து முடித்துள்ளது இந்தியா! இந்த வல்லரசுத் தன்மையைத்தானே கடவுளுக்கு நிகராக இந்திய மீடியாவினால் தூக்கி நிறுத்தப்பட்ட அப்துல்கலாமும் எதிர்பார்த்தார்! இப்போது கண்டிப்பாக பூரித்துப் போயிருப்பார்!

இந்த நேரத்தில் அப்துல்கலாமை தேவையில்லாமல் சுட்டிக்காட்டவில்லை. இலங்கைப் பிரச்சனையை, தனது எழுத்து சரியான விதத்தில் வெளிக்கொணரவில்லை என்று வருத்தத்துடன் ஒப்புதல் வாக்குமூலம் கொடுத்தார் எழுத்தாளர் அருந்ததிராய். தனது கட்சியின் தமிழர் விரோதப்போக்கு பிடிக்காமல் பதவியை உதறிவிட்டு இன்றுவரை ஈழத்தமிழனுக்காக தனியொருவனாகக் குரல் கொடுக்கிறார் தமிழருவி மணியன். எந்தவகையிலாவது ஈழத்தமிழனுக்கு விடிவு வராதா என்று திரையுலகிலிருந்து, யாரையும் எதிர்பார்க்காமல் சீமான் என்ற தனிமனிதன் போராடுகிறான். இவர்களுக்கு இருக்கும் அக்கறையில் சிறிதளவாவது, இலங்கைக்கு வெகு அருகில், ராமேஸ்வரத்தில் பிறந்து வளர்ந்த அப்துல்கலாமுக்கு இருக்க வேண்டுமென நான் எதிர்பார்ப்பதில் என்ன தவறு? ஒரு வார்த்தை போதாதா ஒட்டுமொத்த இந்தியர்களையும் சரியான பாதையில் சிந்திக்க வைக்க? பஞ்சாபிகளுக்காக பிரதமர் குரல் கொடுக்கும்போது தமிழர்களுக்கு எதிரான மனிதநேயப் படுகொலையை கண்டிக்கும் பொறுப்பு அப்துல்கலாமுக்கு இல்லையா?

அட, தமிழர்கள் என்று கூட வேண்டாம். நமது அருகிலுள்ள நாட்டில் நடைபெறும் படுகொலைகளுக்கு இந்தியா ஆதரவாக இருப்பது சராசரி இந்தியர்களுக்கு தெரியாமல் இருக்கலாம், முப்படைகளையும் நிர்வகித்த ஒரு முன்னாள் ஜனாதிபதிக்குமா தெரியாமல் போகும்? ஒரு மனிதநேயத்துடனாவது இதை எதிர்த்து குரல் எழுப்ப வேண்டாமா? இவர் எதிர்பார்க்கும் வல்லரசு இதுவென்றால் அப்படி ஒரு வல்லரசுக் கனவு அமெரிக்காவோடு ஒழிந்து போகட்டும்!

பொய்யாகிப் போகாதோ?

2009-05-19T09:26:00.000-07:00

பொய்யாகிப் போகாதோ?
உன் மரணம்
பொய்யாகிப் போகாதோ?
நீ
பக்கத்திலிருந்த தைரியத்தால்
வீரம் பேசித் திரிந்தோமே...
வீணாய்ப் போனதே
அத்தனையும்!
வீணாய்ப் போனதேன்
அத்தனையும்?

இறுதிவரை நீ
ஈழ மண்ணை விட்டு
ஓடவில்லை!
உன் உறுதி
கர்வப்பட வைக்கிறது...
நீ ஓடி
உயிர்தப்பியிருக்கக்கூடாதா?
என்
உள்மனம் ஏங்குகிறது!

மெய் சிலிர்த்துக் கிடந்தோமே!
தமிழனுக்கென்று அரசாங்கம்
தமிழனுக்கொரு ராணுவம்
தமிழனுக்கொரு தலைவன்
பொய்யாகிப் போனதே
அத்தனையும்!

இனப்படுகொலையின்
வலியை உணர்ந்தாய் நீ...
வலியை உணர்ந்தவர்கள்
உன் பின்னால் சேர
வலிமையானாய் நீ!
தமிழனைக் காக்கத்தானே
நீ
துப்பாக்கி தூக்கினாய்?
உன் பின்னால்
பீரங்கியே அணிவகுத்ததே
பின்னாளில்!
இன்று
எட்டி நின்று
வேடிக்கை பார்க்கும் தமிழகம்
அன்று உன்னை
தட்டிக் கொடுத்ததே!

உலகத்தின் சுழற்சியால்
சூழ்ச்சியால்
இனப்போராளி உன்னை
தீவிரவாதியென்றல்லவா
தடை செய்தது!
அடிமேல் அடி விழுந்தாலும்
"ஓயாத அலை"யாக
சுழன்றடித்த நீ
இன்று அமைதியானாயே!

பதுங்கு குழிகள்
பாதுகாப்பு வளையமென
தமிழரைக் கொன்றொழித்து
உன்னைப் பழியாக்கி
பலியாக்கிய
உலகத்தின் சூழ்ச்சியை
எப்படிச் சொல்வேன்?
வெட்கக்கேடு!

எழுதப்படும் வரலாறுகள்
உன்னை
எப்படி வேண்டுமானாலும்
சொல்லட்டும்...
உன் உறுதியை
உன் வலிமையை
உன் பெருமையை
என் பேரனுக்கும்
சொல்லிக்கொடுத்து உரமேற்றுவேன்...
அதுபோதும் எனக்கு!

தேர்தல் முடிவுகள்- 2009 - ஒரு கண்ணோட்டம்

2009-05-16T09:04:00.001-07:00

ஒவ்வொரு தேர்தலுக்கும் ஏதாவதொரு சிறப்பு சொல்லப்படும். அந்தவகையில் பார்த்தால், இந்த தேர்தல், ஈழம் உள்ளிட்ட அனைத்துலக தமிழர்களாலும் பெரிதும் எதிர்பார்க்கப்பட்டது. ஈழத்தமிழர்களின் வாழ்நிலையின் துயர் துடைக்கும் வழிகோலாக இருக்குமென்ற எதிர்பார்ப்பு அனைவரிடத்தும் இருந்தது. அந்த வகையில் பார்த்தால் பெருத்த ஏமாற்றம் மிஞ்சியதை ஒப்புக்கொண்டுதான் ஆக வேண்டும்.

மணிசங்கர் உள்ளிட்ட காங்கிரஸ் பெருந்தலைகள் உருண்டாலும் வைகோவின் தோல்விதான் இருதரப்பிலும் பெருத்த அதிர்வை ஏற்படுத்தி இருக்கிறது.அவரவர் நிலைப்பாட்டைப் பொறுத்து பெருத்த சோகமாகவோ, பெருத்த மகிழ்ச்சியாகவோ ஏற்றுக்கொள்ளப்படுகிறது. மத்திய அமைச்சர் சிதம்பரத்தின் தலை தப்பியது இறுதிக்கட்ட திருப்பம்! நிழல் அரசியல்வாதியாகவே அனைவராலும் அறியப்பட்ட மு.க. அழகிரியின் பிரம்மாண்ட வெற்றி, பணநாயகத்தின் வெற்றி என்று மட்டும் சொல்லித் தட்டிக் கழித்துவிட இயலாது. தேர்தலுக்குக்காகத் தரப்படும் பணத்தையும் பொருட்டாக மதித்து வாக்கினை அளிக்கும் மனநிலைக்கு மாறி வருவதையும், வழக்கமாக உணவகங்களில் தரப்படும் "டிப்ஸ்" போல இப்பணம் மதிக்கப்படுவதையும் கருத்தில் கொள்ள வேண்டும்.

அடுத்து, அதிரடி "ஒட்டு மாங்கனி" பாமாகாவின் தோல்வி குறித்து பார்க்கலாம். ஒவ்வொரு தேர்தலுக்கும் ஒரு கூட்டு சேர்வதும், பெரியண்ணன், அன்புச்சகோதரி எனப் புகழ்ந்து சில தொகுதிகளைக் கேட்டுப் பெறுவதுமாக அரசியல் செய்து, மத்திய அமைச்சர் பதவியை தனது மகனுக்கு வாங்கிக் கொடுத்து அழகு பார்த்த ராமதாஸுக்கு மக்கள் தந்த "சவுக்கடி"தான் இத்தேர்தல் முடிவு! தான் போட்டியிட்ட அனைத்து தொகுதிகளிலும் தோல்வியைத் தழுவியிருக்கும் பாமாகாவுக்கு, இனியாவது கூட்டணித் தலைவர்கள் அளந்து அளந்து தொகுதிகளை அளிப்பார்கள் என நம்பலாம்! தொகுதிப் பங்கீட்டில் அசிங்கப்படுத்தப்பட்ட வைகோவாவது ஒரு தொகுதியில் வெற்றி பெற்று விட்டார்!

எம்ஜியாரின் இரட்டை இலை இனியும் அதிமுகவை கைதூக்கி விடுமா என்பது சந்தேகம்தான். தற்போதய திமுகவின் ஆட்சியில் பேருந்துக் கட்டண உயர்வு, மின்வெட்டு, காவிரி, ஒகெனக்கல் பிரச்சனை என எத்தனையோ பிரச்சனைகள் எழுந்தபோதும், எதிர்க்கட்சியான அதிமுகவின் தலைவி ஜெயலலிதா, செயல்படாத தலைவர் போலவே அக்கறை எடுத்துக்கொள்ளாமல் இருந்துவிட்டார். தேர்தலின்போது இரண்டு மாதம் அரசியல் பண்ணினால் மட்டும் போதுமென்று யாராவது "பத்திரிக்கை நண்பர்கள்" ஆலோசனை கொடுத்திருக்கலாம்! அதன்படியே செயல்பட்டு, அல்லல்பட்டு, இப்போது கூட்டணி பலத்தால் அடைந்திருக்க வேண்டிய பிரமாண்ட வெற்றியைக் கோட்டை விட்டு நிற்கிறார்! இப்படியே தொடர்ந்தால் கோட்டையையும் இவர் விடுவது நிச்சயம்! தேர்தலின்போது இவர் எழுப்பிய திடீர் ஈழ ஆதரவு கோசத்தை, தமிழுணர்வாளர்களைத் தவிர மற்ற எவரும் ஒரு பொருட்டாகவே மதிக்கவில்லை. ஒவ்வொரு பொதுக்கூட்டத்திலும் தொடர்ச்சியாக எழுதி வைத்து ஒப்பித்தும், கேள்வி கேட்டும் இவர் செய்த பிரச்சாரம் கேலியாகவே மக்களால் பார்க்கப்பட்டுள்ளது!
ஜெயலலிதாவிற்கு ஒரு கேள்வி: இனியும் இப்படியே மந்தமாக அரசியல் செய்வீர்களா?!

நம்ம விஜயகாந்த், கார்த்திக், சரத்குமார் உள்ளிட்ட அனைவருமே காங்கிரஸ் கூட்டணிக்கு தங்களால் இயன்ற அளவு "கைமாறு" செய்திருக்கிறார்கள். அதற்கு கைமாறாக தொடர்சியாக இவர்களின் படங்களை சன் தொலைக்காட்சி குழுமத்தில் கண்டு ரசிக்கலாம்! வைகோவின் தோல்விக்கும், கார்த்திக் பெற்ற வாக்குக்கும் நேரடித் தொடர்பே இருக்கிறது. மற்ற தொகுதிகளில் விஜயகாந்த்தின் பங்கு எவ்வளவென்று, அவர் கூட்டணி வைப்பதற்காக டெல்லியில் மன்றாடிய தெய்வத்திற்குத்தான் தெரியும்!

இவ்வளவையும் சொல்லியாச்சு, கலைஞரைப் பற்றியும் சொல்லாமல் விடலாமா? கடந்த பொதுத்தேர்தலில் இவர் எழுப்பிய நாளை நமதே! நாற்பதும் நமதே! என்ற கோஷம், தற்போது ஜெயலலிதாவாலும் காப்பியடிக்கும் அளவிற்கு பரபரப்பான கோஷமாக அமைந்து விட்டது. அப்போது திமுக பெற்ற பிரமாண்ட வெற்றி போலவே, இம்முறையும் எதிர்பாராத வெற்றியைப் பெற்றிருக்கிறது. திமுகவின் வெற்றியால் தேர்தலுக்குப் பின்னால் அதிமுகவும், பாமகவும் கூட்டணி மாறும் குளறுபடிகள் தவிர்க்கப்பட்டுள்ளன. வட மாநிலங்களில் உள்ள மாநிலக் கட்சிகளுக்கு நிகராகத் தனது தனிப்பட்ட செல்வாக்கை, திமுக மேலும் உயர்த்தியுள்ளது. மாநிலத்திலும் மத்தியிலும் நிலையான ஆட்சிக்கு இனி பாதிப்பில்லை. இதோ, கில்லி மாதிரி கிளம்பி விட்டார் டெல்லிக்கு... விரும்பிய அமைச்சர் பதவியை பேசி வாங்கி வர. வாழ்த்துகள்! இந்த வேகத்தைத் தான் ஈழப் பிரச்சனையிலும் அனைவரும் எதிர்பார்ப்பது. தந்தி அனுப்பி விட்டு, இங்கேயே குந்தியிருந்தால் நினைத்த தொகுதியைப் பெற முடியாதென்பது, தந்திக்கு மதிப்பில்லை என்பது உங்களுக்குத் தெரியாததா என்ன?

மத்திய காங்கிரஸின் அசைக்க முடியாத வெற்றி, பாஜகாவையும், செம்படைத் தோழர்களையும் அதள பாதாளத்துக்கே தள்ளி விட்டது உண்மை! அத்வானியின் பிரதமர் கனவு, பகற்கனவாகி வருகிறது. இதோ, மோடி தயாராகி விட்டார், கனவு காண! கனவு காணுங்கள், தூங்காமல் கனவு காணுங்கள்! இனிவரும் தேர்தலில், கூட்டணித் தாவல் தடைச் சட்டம் கொண்டு வருவதும், வாக்குப் பதிவு எந்திரத்தில் வாக்களிக்க விருப்பமில்லாதவர்களுக்கான பொத்தானும் மாறுதலாக மலர வேண்டும். காலம் மாறும்போது ஜனநாயகப் பாதையிலும் மறுமலர்ச்சி வேண்டாமா?

இப்படிக்கு... அம்மா!

2009-05-10T00:10:00.000-07:00

இரவுபகலறியாமல்
கருவறையிலிருந்த குழந்தை
நள்ளிரவில் அழுதவுடன்
சட்டென விழித்து
பாலூட்டியமர்த்துவாள்...
இரவுபகலறியாமல்!
------------------

நான்
நித்தம் காணும் நிலவு
இன்றுவரை
கறை துடைக்கப்படாமல்
அப்படியே இருக்கிறது...
யாரோவொரு தாய்
இன்றும்கூட
நிலாச்சோறு ஊட்டியிருக்கிறாள்!
------------------

மழலையிடம் மொழி பழக
தவழுகையில் துள்ளிக்குதிக்க
புன்னகையைப் படம்பிடிக்க
வீதியிலிறங்கிச் சோறூட்ட
வாரக்கடைசி வரத்திற்காக
ஒவ்வொருநாளும் வேண்டியபடி...
பணிக்குச் செல்லும் அம்மா!
------------------

உருண்டு புரண்டு விளையாடி
அழுக்காக்கிய உடையுடன்
வீடு திரும்பியவனை
அதட்டி அடித்தவளின்
வீட்டுக் கொடியில்
மறுநாள்
பளிச்செனக் காயும் உடைகள்...
மீண்டும் அழுக்காகத் தயாராய்!
------------------

மகளுக்கு முதல் தோழியாய்
உலகைப் புரியவைத்து
செல்லமாய் கண்டித்து
சிலநேரம் கண்காணித்து...
தலை நரைத்தபின்னும்
தொடர்கிறது
தலைமுறை தாண்டிய பய(ண)ம்!

திமுகவை விட்டுப் பிரிந்துவிட்ட திரு.மு.க!

2009-05-06T19:27:00.000-07:00

எம்ஜியார் சிறுநீரகக் கோளாறால் பாதிக்கப்பட்டு அமெரிக்காவில் சிகிச்சை பெற்றுவந்த வேளையில் நடைபெற்ற தேர்தலின்பொது எம்ஜியார் மறைந்துவிட்டார் என்றும், எம்ஜியாரின் மரணத்தை மறைத்துவைத்து தேர்தலில் போட்டி போடுகிறார்கள் என்றும் எம்ஜியார் பற்றி வதந்தியை பரப்பி விட்டு அன்றைய காலகட்டத்தில் கருணாநிதி அரசியல் செய்தார். அந்தோ பரிதாபம்! இப்போது தான் நல்லநிலையில் இருந்தபோதும், தனக்கு நோவு வந்ததென தனக்குத்தானே கூறிக் கொண்டு மருத்துவமனைக்கட்டிலில் தொடர்ந்து இருந்தபடி பரிதாபத்தைச் சம்பாத்தித்து தேர்தலை எதிர்கொள்ள வேண்டிய நிலை.

ஏன் இந்த இழிநிலை?

தன்னை காலங்காலமாக தமிழினத்தலைவராக தலைமேல் தூக்கி வைத்துக் கொண்டாடிய திமுக தொண்டர்களையே மனம் நொந்துபோகும்படியல்லவா காங்கிரசோடு இவர் பின்னிப் பிணைந்துள்ளார். தமிழ் உணர்வு, ஈழத்தமிழர் ஆதரவு என்பது ஒவ்வொரு திமுகவினருக்கும் இவரால் ஊட்டப்பட்ட உணர்வு என்றால் மிகையாகாது. ஆனால் அந்த உணர்விற்கே இவர் துரோகம் செய்வதை திமுகவினராலேயே தாங்கிக் கொள்ள முடியாத நிலை. ஆம், கருணாநிதியைப் போல அனைவராலும் உணர்வுகளை மழுங்கச் செய்ய இயலாதல்லா? அவருக்கும் ஒருகாலத்தில் உணர்வு இருந்தது. ஆனால் தற்போது அவரது குடும்பத்தினர் அக்மார்க் வியாபாரிகளாக மாறிவிட்ட சூழலில் உணர்வாவது, மண்ணாங்கட்டியாவது என்ற கருணாநிதியின் நிலையை அவரது ஒவ்வொரு நாடகமும் தோலுரித்துக் காட்டத் தொடங்கி விட்டது!

இப்போது, திமுகவின் ஆதரவாளராக அறியப்பட்ட சீமானே ஜெயலலிதாவுக்கு ஓட்டுப் போடுங்கள் என்று வீதி வீதியாக பிரச்சாரம் செய்கிறார். இவர் ஜெயலலிதா ஆசியுடனும், பணத்துடனும் பிரச்சாரத்தில் இறங்கவில்லை. கம்பம் ராமகிருஷ்னன் போன்றவர்களை, ஜெகத்ரட்சகன் போன்றவர்களை சீமானோடு ஒப்பிடக்கூடாது. அவர்கள் கருணாநிதி பணம் கொட்டியதால் சேர்ந்தவர்கள்... சீமானோ, கருணாநிதியின் குணம் கெட்டதால் விலகியவர். இவரைப் போல பல திமுக தொண்டர்களும் மனதளவில் கருணாநிதியை விட்டு வெகுதூரம் விலகிச் சென்று விட்டார்கள் என்பது தான் இப்போதய நிலை.

எம்ஜியார் பிரிந்தபோது கருணாநநிதியின் அரசியல் பிடிக்காமல் எம்ஜியாரோடு ஒரு பெரும் பிரிவினர் எம்ஜியார் பக்கம் சேர்ந்தார்கள். அதன்பிறகு வைகோ பிரிந்தபோதும் ஓரளவு அந்த மாதிரி நிலை ஏற்பட்டது. இப்போது யாரும் கருணாநிதியை விட்டுப் பிரியவில்லை, இருந்தும் இப்போதும் பல திமுகவினர் கருணாநிதியை விட்டு விலகி ஜெயலலிதாவையோ, விஜயகாந்தையோ ஆதரிக்கும் நிலைக்குத் தள்ளப்பட்டுள்ளனர்.

எதனால்???

ஆம்! கருணாநிதி இப்போது திமுகவைவிட்டு, திமுகவின் கொள்கையை விட்டுப் பிரிந்துவிட்டார்!

இப்படியும் உண்ணாவிரதம்!

2009-04-27T10:47:00.000-07:00

கருணாநிதியின் 7 மணி நேர உண்ணாவிரதம் பற்றி அவருக்கு மிகவும் பிடித்த வடிவேலு பாணியில் சொல்வதானால், ஸ்டார்ட்டிங்கு நல்லாதான் இருந்துச்சு, பினிஷிங்கு சரியில்லயேப்பா! மிகக் குறுகிய நேர உண்ணாவிரதம் என்றவகையில் கின்னஸ் சாதனை படைத்திருகும் இந்த உண்ணாவிரதத்தின் அவசர அவசியம்தான் என்ன?.

ஜெயலலிதா, தனி ஈழம் அமைவதை ஆதரித்தது கருணாநிதிக்கு உண்மையில் பயங்கர அதிர்ச்சி வைத்தியமாகத்தான் இருந்திருக்கும்! இதைவிட ஒருபடி அதிகமாக என்ன அரசியல் ஸ்டண்ட் அடிப்பது என்று இரவு முழுக்க தூங்காமல் யோசித்திருப்பார்! "நான் இரவு முழுவதும் போர் நிறுத்தம் குறித்து இலங்கை அரசின் அறிவிப்பு வருமென்று எதிர்பார்த்து விழித்திருந்தேன் என்பதில், விழித்திருந்ததற்கான காரணம் ஜெயலலிதாவின் அதிரடி அறிவிப்பாகத்தான் இருக்கும் என்பதில் ஐயமில்லை!

அதுபோகட்டும்... கருணாநிதியின் உண்ணாவிரதம் நம்முள் பல்வேறு கேள்விகளை எழுப்புவதை தவிர்க்க இயலாது. அவற்றை கீழே தந்துள்ளேன்.

1. கருணாநிதியின் வீட்டினருக்கே தெரியாமல் எடுக்கப்பட்ட உண்ணாவிரத முடிவு, கடந்த ஜூனியர் விகடன் இதழில் அப்படியே கவர் ஸ்டோரியாக வந்திருந்தது எப்படி?

2. திடீரென நினைத்த இடத்தில் உண்ணாவிரதம் இருப்பவர், இதே இலங்கைப் பிரச்சனைக்காக தொடர் உண்ணாவிரதமிருந்த தாய்மார்களை, நாயினும் கேவலமாக போராட்டத்திற்கு இடம்தேடி அலைய வைத்தது நியாயமா?

3. கருணாநிதி தந்தியனுப்பியும், தீர்மானம் போட்டும், கதறியழுதும் திரும்பிப் பார்க்காத மத்திய அரசு, இப்போது சுறுசுறுப்பாக பேச்சுவார்த்தை நடப்பதுபோல காட்டிக் கொள்வதும், அதற்கு இலங்கை இசைவது போல ஒரு தோற்றத்தை ஏற்படுத்த முனைவதும் பெரிய அரசியல் சதியை வெளிப்படுத்துகிறதே? அது என்னவென்றால், கிட்டத்தட்ட, பெரும்பான்மை ஈழப் பகுதிகளைத் தனது கட்டுப்பாட்டினுள் கொண்டு வந்தபிறகு, போர் நடவடிக்கையை நிறைவுக்குக் கொண்டு வரும் தருணத்தில், நீ அடிக்கிற மாதிரி அடி! நான் அழுவுற மாதிரி அழுவுரேன்! என்று கருணாநிதி, மத்திய அரசு, இலங்கை அரசு ஒரு கூட்டு நாடகத்தில் நடிப்பது போலவும், அதற்கும் நாமறிந்த வசனகர்த்தாவே இதனை இயக்கி இருப்பது போலவும் தெரிகிறதே?

4. மத்திய அரசு அழுத்தம் கொடுத்தால் இலங்கை கேட்டு நடக்கும் என்பது உண்மையாகி விட்டது அல்லவா? இப்பொது எங்கே போனது இலங்கையின் இறையாண்மை?

5. கருணாநிதி நினைத்தால் மத்திய அரசை சில மணி நேரத்திற்குள்ளாகவே ஆட்டிவிக்க முடிகிறது. அப்படியானால் இத்தனை காலம், இவ்வளவு படுகொலைகள் நடந்து முடிவதற்காகத்தான் காத்திருந்தாரோ?

6. இப்போது, போர் நிறுத்தமெல்லாம் கிடயாது என்று இலங்கை அரசு மீண்டும் மறுத்திருக்கிறது. இனி, அடுத்ததாக யார், எங்கே உண்ணாவிரதம் இருக்கப் போகிறார்கள்?

7. கருணா - கருணாநிதி; இருவருமே கிட்டத்தட்ட ஒன்றுதானா?

எப்படியோ, காங்கிரஸ் கூட்டணியின் அழிவுக்கு கருணாநிதியே தனது பங்கை தொடங்கி வைத்திருக்கிறார்! இன்னும் தொடரும்...

கூஜ பக்க்ஷே Vs கேனன் & கோ

2009-04-25T08:36:00.000-07:00

இலங்கையில் நடக்கும் இனப்படுகொலையை தடுத்து நிறுத்த அனுப்பபட்ட சிறப்பு தூதுவர்கள் என்று "கவிதை சுனாமி" வருணாநிதியால் பாராட்டப்பட்ட சிறப்பு தூதுக்கிளிகள் “கேனனும், சாராயணனும்” "அகிம்சைப் பேரொளி" கூஜ பக்ஷேவுடன் அப்படி என்னதான் பேசி இருப்பார்கள்? இதோ அங்கு நடந்த உரையாடலை என்னுடய "ரா!ரா! சரசக்கு ரா!ரா!" அமைப்பு துப்பறிந்து அப்படியே வழங்குகிறது!

கூஜ பக்க்ஷே: என்ன இது திடீர்னு இந்தப்பக்கம்? வாக்கிங் போறப்ப வழிதவறி வந்துட்டிங்களா?

கேனன் & கோ: (தலையைச் சொறிந்தபடி) வழியெல்லாம் தவறல... நம்ம தன்மோகன்கிங்குதான் சும்மா உங்கல பார்த்து வரச்சொன்னாரு...

கூஜ பக்க்ஷே: அந்தாளுக்கு வேற வேலயே கிடயாதா? ஹார்ட் ஆபரேசன் பண்ணியிருக்காறேன்னு பார்க்கறேன்.. இல்லைன்னா அசிங்க அசிங்கமா திட்டிடுவேன்!

கேனன் & கோ: ஏன் எங்க மேல எறிஞ்சு விழுறீங்க? நாங்கதான் உங்களுக்கு இன்னைக்குவரைக்கும் ஹெல்ப் பண்ணிட்டு இருக்கோம்கறத மறந்துடாதிங்க!

கூஜ பக்க்ஷே: நீங்க என்கிட்ட இப்ப சொல்றத மட்டும் இன்னும் கொஞ்சம் சத்தமா சொன்னீங்க, தமிழ்நாட்டுக்கே தெரிஞ்சிடும்! அப்புறம் தேர்தல்ல நீங்க நாமம்தான் போட்டுக்கணும்!

கேனன் & கோ: அதுவிஷயமாத்தான் உங்களைப் பார்க்க வந்தோம்..

கூஜ பக்க்ஷே: அது விசயமாவா? எந்தமாதிரி நாமம் போடுறதுன்னா?

கேனன் & கோ: அதில்லைங்க, தமிழ்நாட்டு தேர்தல்ல ஜெயிக்கிறது விசயமா...

கூஜ பக்க்ஷே: யோவ், அதுக்குத்தான் அங்கயும் ஒரு வருணாவை வச்சிருக்கோம்ல? எதிர்க்கட்சிகளை ஒண்ணுசேர விடாம போராட்டத்தை அமுக்குறதுதான அவருக்கு நாம குடுத்த அசைன்மென்ட்டு? சரியா பண்ண மாட்டிங்கிறாரோ?

கேனன் & கோ: அதெல்லாம் சரியாத்தான் நடக்குது... "தமிழ்நாட்டு புலி" “குருமா”வையே புல்லைத் திங்க வச்சுட்டார்னா பாருங்களேன்!

கூஜ பக்க்ஷே: பின்ன என்னைய்யா பிரச்சனை?

கேனன் & கோ:அரசியல்கட்சிகளை அடக்கியாச்சி... ஆனா, இன்னொருபக்கம் கொஞ்சம் பொம்பளைங்க ஒண்ணு சேர்ந்துக்கிட்டு சாகும்வரை உண்ணாவிரதம்னு சொல்லிட்டு பிரச்சனையை கிளறிவிடுறாங்க... அந்தப்பக்கம் சாரதிராஜான்னு ஒரு டைரக்டர், "என் இனிய தமிழ் மக்களே"ன்னு கெளம்பிட்டாரு!

கூஜ பக்க்ஷே: என்னய்யா பண்றாரு வருணாநிதி? சாரதிராஜாவையும் தூக்கி உள்ளபோட வேண்டியதுதான? எங்க நாட்டுல உள்ள போட மாட்டோம்.. மொத்தமா போட்டுத்தள்ளிடுவோம்!

கேனன் & கோ: அதான் "அசந்த"க்கு என்ன நடந்ததுன்னு தெரியுமே! அதிருக்கட்டும்... நீங்களும் கொஞ்சம் எங்களுக்கு ஹெல்ப் பண்ணணுமே...(திரும்பவும் தலையைச் சொறிகிறார்கள்)

கூஜ பக்க்ஷே: (கேனனைப் பார்த்து) உன் தலைல என்ன இருக்குதுன்னு இந்த சொறி சொறியுற?

கேனன் & கோ: அதில்லைங்க, கொஞ்சனாளைக்கு போரை நிறுத்துற மாதிரி அறிக்கை விட்டிங்கன்னா, தேர்தல் முடிஞ்சதும் அன்னைக்கு நைட்டே மொத்தமா ஒரே குண்டுல அவனுங்கள போட்டுத்தள்ளிடலாம்...

கூஜ பக்க்ஷே: போர நிறுத்துறதா? அதான் சுத்தி வளைச்சாசுல்ல? திரபாகரன் ஒருத்தந்தான் பாக்கி... நாளைக்கே அவன் கதையும் க்ளோஸ்!

கேனன் & கோ: என்ன இது? பத்திரிக்கைக்காறங்களுக்கு பேட்டி குடுக்குற மாதிரியே எங்க கிட்டயே பொய் சொல்றீங்க? அதான் திரபாகரன் அங்க இருக்கானா இல்லையான்னே நமக்கு ஒரு மண்ணும் தெரியாது... சும்மானாலும் அதை பிடிச்சாச்சு, இதைப் பிடிச்சாச்சு, அவன் மாட்டிக்கிட்டான், இவன் மாட்டிக்கிட்டான்னு கதை விட்டுக்கிட்டிருக்கோம்...

கூஜ பக்க்ஷே: நாம சொல்றதத்தான் ஐநா சபைல இருந்து அத்தனை பேரும் நம்புறாங்கல்ல? பிறகென்ன?

கேனன் & கோ: அதுசரி, இருந்தாலும் ரெண்டு நாளுக்குள்ள ஒரு லட்சம் மக்களும் வெளியேறி வந்துட்டங்ககறத யாரும் நம்ப மாட்டாங்கலே? அப்படியே நம்பினாலும், அத்தனை பேரையும் எங்க தங்க வச்சிருக்கீங்கன்னு கேட்டா என்ன சொல்றது?

கூஜ பக்க்ஷே: (கடுப்புடன்) உன் வீட்டுல தங்க வச்சிருக்கேன்னு சொல்லு! யோவ்! நீங்க என்ன முடிவோட வந்திருக்கீங்கய்யா? என்னையே குழப்பிடுவீங்க போல!

கேனன் & கோ: அதில்லை நண்பா, ரெண்டுகட்ட தெர்தல் முடிஞ்சுடுச்சு, அடுத்து தமிழ்நாட்டுக்கும் தேர்தல் பிரச்சாரம் பண்ண “போனியா” வந்தாகணும். அவங்க வந்தாலும் 40தொகுதியில் ஜெயிக்க முடியாதுங்கறது வேற விசயம்... ஆனா கொஞ்சத்துக்கு கொஞ்சமாவது ஜெயிக்கணும் இல்லயா? அவங்க ஜெயிச்சுவந்தாதான வழக்கம்போல உனக்கு ஹெல்ப் பண்ண முடியும்? என்ன நான் சொல்றது?

கூஜ பக்க்ஷே: அதுசரி, அவங்க தமிழ்நாட்டுக்கு வர நான் என்ன பண்ணனும்? "அன்னை போனியாவே! வருக வருக!"னு போஸ்டர் அடிச்சு ஒட்டணுமா?

கேனன் & கோ: அடக்கடவுளே! அப்படி போஸ்டர் அடிக்கத்தான் ஏற்கனவே மாங்கிரசுக்குள்ளயே ஆயிரத்தெட்டு கோஷ்டி இருக்குதே! இதுல நீ வேறயா?! கொஞ்ச நாளைக்கு போரை நிறுத்தறோம்னு ஒரே ஒரு அறிக்கை மட்டும் விடு.. அது போதும் இப்போதைக்கு!

கூஜ பக்க்ஷே: என்னப்பா இது! உங்க இந்திய அரசியல்வாதிகளோட ஒரே அக்கப்போரா இருக்கு! இங்கபாரு, சொந்த நாட்டு மக்கள் மேலயே குண்டு போட்டு தினமும் ஆயிரக்கணக்குல கொன்னுக்கிட்டு இருக்கேன்... அத்தனை கட்சிக்காரங்களும் கம்முன்னு வேடிக்கை பார்த்துக்கிட்டு இருக்காங்க... உங்க நாட்டுல என்னடான்னா, ஆளாளுக்கு அறிக்கை விடுறானுங்க! எங்களை மாதிரி அதிபர் ஆட்சிதான் உங்களுக்கும் லாயக்கு!

கேனன் & கோ: உங்க நாட்டுல அதிபர் ஆட்சி நடக்குது... எங்க நாட்டுல எங்களை மாதிரி அதிகாரிங்க ஆட்சி நடக்குது! அவ்வளவுதான் வித்தியாசம்! பிரதமரா இருந்தாலும் நான் சொல்ற யோசனயத்தான் கேட்டு நடக்கணும்!

கூஜ பக்க்ஷே: இதுக்கு ஒண்ணும் குறைச்சலில்ல, நீங்க சொல்றதுல்லாம் புரியுது. எதுக்கும் என் சகோதரர்ககிட்ட கலந்து பேசிட்டு நான் அறிக்கை விட முடியும்.

கேனன் & கோ: அப்போ சம்மதம்தான்னு எடுத்துக்கலாமா? அப்படியே போற வழியில வருணாநிதிகிட்ட சொல்லிட்டுப்போனா, அடுத்த நாள் காலைப் பேப்பருக்கு ஒரு கவிதை ரெடி பண்ணிடுவாரு! அப்படியே உங்களுக்கு "அகிம்சைப் பேரொளி" பட்டமும் குடுத்தாலும் குடுப்பாரு!

கூஜ பக்க்ஷே: அந்த பட்டத்தை அப்படியே காத்துல எங்க நாட்டுப் பக்கமா பறக்க விடுங்க புடிச்சுக்கறேன்!

(ஜோக்குக்கு சிரித்தபடி கைகுலுக்கி விடை பெறுகிறார்கள்!)

விடைபெற்றபின்...
------------------
கூஜ பக்க்ஷே: இந்த கோமாளிகள் இப்படி எதாவது சொல்லிக்கிட்டேதான் இருப்பானுங்க... இறுதித் தமிழன் இருக்கும்வரை நம்மளோட படுகொலைப் பொழுதுபோக்கை நிறுத்தவே கூடாது!

அரசியல் அதிரடிச் சிரிப்புகள்!

2009-04-19T18:31:00.000-07:00

"இந்த தொகுதியில கள்ள ஓட்டு பதிவாகியிருக்கலாம்னு சந்தேகப்படுறாங்களாமே?"

"பின்ன, இங்க மட்டும் நூற்றிநாற்பது சதவீதம் வாக்கு பதிவாகி இருக்குதே!"
-----------------------------------------------------------------------------------

"செத்தவங்க ஓட்டெல்லாம் போடாதடான்னு என் பையன்கிட்ட படிச்சு படிச்சு சொன்னேன்!"

"ஏன், போலீஸ்ல மாட்டிக்கிட்டானா?"

"இல்ல, பேய்ங்ககிட்ட மாட்டி, அறை வாங்கிட்டு பேச்சு மூச்சில்லாம படுத்திருக்கான்!"
-----------------------------------------------------------------------------------

"தலைவரோட தேர்தல் ஸ்டண்ட் அளவுக்கதிகமா போகுது!"

"எப்படி சொல்ற?"

"பிரச்சாரத்துக்குப் போற வழியில, தரையில படர்ந்திருந்த பூசணிக் கொடிக்காக தன்னோட பிரச்சார வேனையே நிறுத்திட்டு இன்னொரு வேன்ல கிளம்பிட்டாரே!"
-----------------------------------------------------------------------------------

"தலைவரோட பிரச்சாரம் சூடு பிடிச்சுடுச்சு!"

"எப்படி சொல்ற?"

"இப்பல்லாம் அடிக்கடி டாய்லெட் போறாரே!"
-----------------------------------------------------------------------------------

"எதிர்க்கட்சிகளின் சூழ்ச்சியால் நமது கட்சிப் பொதுக்கூட்டங்களில் அதிக அளவு பிக்பாக்கெட் நடப்பதால், பேச்சைக் கவனிப்பதோடு பாக்கெட்டையும் கவனித்துக் கொள்ளுமாறு பணிவன்புடன் கேட்டுக் கொள்ள்கிறேன்!"

குறி தப்பாத காலணிக் கவிதைகள்!

2009-04-13T18:26:00.000-07:00

குப்பையில்
காலணிகளை வீசுங்கள்
குறி தப்பாமல்!
------------------------

குறி தப்பிய காலணியில்
புதைந்து கிடந்தது
வரலாற்று சோகம்!
------------------------

முடிவு கட்ட வேண்டாம்
இந்த
காலணி ஆதிக்கத்திற்கு!
------------------------

ராமாயணக் கதையில்
ஆட்சி செய்த காலணிகள்
புரட்சியில் இன்று!
------------------------

நசுக்க நசுக்க
புரட்சி வெடிக்குமாம்...
புரியவைத்தது காலணி!
------------------------

காலணிக்குத் தடை வந்தால்
எறிகணையாகுமோ
எழுதுகோல்கள்?

கர்வப்படு; கறுப்பாய் பிறந்ததற்கு...

2009-03-28T06:15:00.000-07:00

கறுப்பு...
நிறங்களின் தாய்
மற்றதெல்லாம் சேய்!

வண்ணக்கலவையின்
உச்சமிது
மற்றதெல்லாம் மிச்சமே!

நிறமிகளின் நிறையே
கறுப்பு
குறைபாடே வெண்மை!

இல்லாமையின் நிறம்
கறுப்பு
எல்லாமிருப்பதின் நிறமும்
கறுப்புதான்!

துக்கத்தின் நிறமென்று
யாரிதைச் சொன்னது?
தூக்கத்தின் நிறமென்றால்
அதில் உண்மையிருக்கும்!
தூக்கம் வந்தாலே
கரு'மை" பூசிய இமைகள்
கண்களுக்கு
கருமை போர்த்தும்!

வெண்மேகம்
கருமை சூடினால்
பூமியெங்கும்
பூப்பூக்கும்!

கருவண்டு
சுவைத்திடவும்
மலர்களெல்லாம்
தேன் வடிக்கும்!

கருமை மூடிய
இரவில்தான்
அடுத்த தலைமுறைக்கான
தேடல் நடக்கிறது!
கருவறை தொட்டு
உலகைக் காணும்வரை
கறுப்பின் கதகதப்புதான்
பாதுகாப்பே!

இயற்கையின்
தொலைக்காட்சியில்
பிறை நிலவும்
நட்சத்திரமும்
கருமை தந்த
அலுக்காத
நெடுந்தொடரல்லவா?!

வெண்மையை
ஆதிக்கமாகவும்
கருமையை
அடிமையாகவும்
வரலாறு பேசுகிறது!
இன்றோ
வெண்மையை
ஆதிக்கம் செய்கிறது
கறுப்பு!

கறுப்பாய் பிறந்ததற்கு
வருத்தப்பட்டால்
புன்னகை தொலைத்திருக்கும்
வைரம்!

கர்வப்படு;
கறுப்பாய் பிறந்ததற்கு...
சில நிமிடங்களாவது!

தேர்தல் வந்திடுச்சு! - மூன்றாம் பாகம்!

2009-03-26T19:07:00.000-07:00

கொத்துக் குண்டுகளால்
செத்து மடியுது
தமிழினம்...
முதுமையைச்
சொறிந்துவிட்டு
அறிக்கைமேல் அறிக்கையாய்
அனுதாபம் தேடுது
சாணக்கியத்தனம்!
---------------------------

அரசியலில்
தலையெடுப்பதற்காக
தலையெடுப்பதாக
மூன்றாந்தர அரசியலில்
நேருவின்
மூன்றாவது தலைமுறை!
எதையெதையோ இடிப்பவர்கள்
இடித்துக் கூறாமல்
குழப்பத்துடன்!
---------------------------

தமிழுணர்வாளர்கள்,
தேர்தலுக்காக
மரத்துக்கு மரம்
தாவியபடி...
சற்று
பொறுமை காக்கட்டும்
முத்துக்குமரன்கள் ஆவி!
---------------------------

காந்தி கடிகாரமும்
மூக்குக் கண்ணாடியும்
பேசிக்கொண்டன...
ஏலத்திலெடுக்கப்பட்ட
டோனிக்கும்கூட
இந்தியாவில்
பாதுகாப்பில்லையாமே!
---------------------------

சென்றமுறை
வெளிநாட்டு வீரர்களை
விலைக்குவாங்கிய ஐ.பி.எல்,
அடுத்தமுறை
தென்னாப்பிரிக்காவை
விலைக்கு வாங்கும்
அதே கிரிக்கெட்டுக்காக!

தேர்தல் வந்திடுச்சு! - இரண்டாம் பாகம்!

2009-03-18T18:46:00.000-07:00

கூடி வாழ்ந்தால்
'கோடி" நன்மை
உண்மை உணர்ந்தவன்
அரசியல்வாதி!
உணராத ஜனமோ
அப்பாவி!
-----------------------------

கொள்கைச் சட்டையை
உரித்துப் போட்ட
நிர்வாணப் பாம்புகள்
இன்னமும் புற்றுக்குள்ளேயே...
பேச்சுவார்த்தை முடியாமல்!
-----------------------------

காத்து 'கருப்பு" பட்டதோ?
'கறுப்பு" எம்ஜியார்
தேய்ந்து
'கறுப்பு" ஆடாக
கசாப்புக் கடையில்!

தேர்தல் வந்திடுச்சு!

2009-03-15T03:00:00.000-07:00

வெள்ளித்திரை விலக்கி
"பிரச்சார பீரங்கி" பவனி!
கையசைக்கிறார்...
புன்னகைக்கிறார்...
வியர்வை துடைக்கிறார்...
சூட்டிங் முடிந்ததும்
கூட்டம் கலைகிறது
"நல்ல கலருடா!"
கொள்கை பேசியபடி!
------------------------

ஈழப் பிரச்சனைக்காக
தெருவில் நின்று
போராடிய பட்டியல்
போகுமிடமெல்லாம்
பறையடிக்கப்படும்!
தானே தமிழனென்றும்
தானைத் தலைவனென்றும்
திரும்பத்திரும்ப
நினைவுபடுத்தப்படும்!
------------------------

தேர்தல் பிரச்சாரத்தில்
யாராவதொரு
"அடுத்த பிரதமர்"
"நன்றி வணக்கம்"
என்று தமிழில் பேச,
ஒரு வரி மட்டும் புரிந்ததில்
புல்லரித்துப் போகும்
கூட்டி வந்த கூட்டம்!
------------------------

தேர்தல் கமிஷனின்
கடுமையான விதிகள்...
கெடுபிடிகள்...
கட்டுப்பாடுகளையெல்லாம்
உடைத்தெறிந்துவிட்டு
எப்பாடுபட்டாவது
காப்பாற்றப்படுகிறது
இந்திய இறையாண்மை!
------------------------

சுவற்றில் இடம்பிடிக்க
போட்டா போட்டி!
யாருக்கும் நம்பிக்கையில்லை...
மக்கள்
மனதில் இடம்பிடிக்க!
------------------------

வரிசையாகப் பலரும்
தேடித்தேடி
பொத்தானை அழுத்தினாலும்
சரியான பொத்தான்
இன்றுவரை
யாருக்கும் அகப்படவேயில்லை!
------------------------

தேர்தலன்று
நாம் செய்யும் தவறு
சில நாட்களாவது உறுத்துகிறது
கரும்புள்ளியாக!
சிலர்
வெட்கமில்லாமல்
துடைத்தபடி...
மீண்டும் கரும்புள்ளி குத்த!
------------------------

காந்தி
மறைந்தும் வாழ்கிறார்...
மறைந்து மறைந்து
வாழ்கிறார்;
ஆரத்தித் தட்டிலும்
வாழை இலைக்கடியிலுமாக!
அர்த்தம் புரிகிறது
காந்தியின் புன்னகைக்கு!

கூட்டணி கூத்துக்கள்!

2009-03-11T19:12:00.000-07:00

"எங்களுக்குள்ள 'கெமிஸ்ட்ரி' ஒர்க்அவுட் ஆனதால கூட்டணிக்கு ஒத்துக்கிட்டேன்னு தலைவர் சொல்றாரே, அதென்ன கெமிஸ்ட்ரி?"

"ஒத்துக்கலைன்னா 'ஆசிட்' ஊத்திடுவோம்னு அவங்க மிரட்டினதத்தான் சொல்றாரு!"
------------------------------------------------------
"அதென்ன கூட்டணி ஜோசியர்?"

"கிரக ராசிப்படி கூட்டணியில எத்தனை கட்சிகள் இருக்கணும், எத்தனை சீட்டு கொடுக்கணும், எந்தெந்த சீட் கொடுக்கணும், கூட்டணிக்கு என்ன பெயர் வைக்கணும்னு எல்லாத்தியும் புட்டுபுட்டு வைப்பாராம்!"
------------------------------------------------------
"கூட்டணி அமைக்கமாட்டேன்னு சொன்ன நம்ம தலைவரை குண்டர் சட்டத்துல கைது பண்ணிட்டாங்களாமே?"
பின்ன? இந்திய இறையாண்மைக்கு எதிரா செயல்பட்டா சும்மா விட்டுடுவாங்களா?!!"

"இவரு கூட்டணி அமைக்கிறதுக்காகவே கட்சி ஆரம்பிச்சிருக்காருன்னு எப்படி சொல்ற?
கட்சியோட பெயரே 'கூட்டணி முன்னேற்றக் கழகம்"னு தான வச்சிருக்காரு!"
------------------------------------------------------
"எதிர்கட்சித் தலைவர், செல்போன்ல ரொம்ப நேரமா உங்ககிட்ட எதுக்காகவோ கெஞ்சிக்கிட்டிருந்தாரே, ஏன்?"

"இருக்கிற எல்லாக் கட்சிகளையும் நாமளே விலைபேசிட்டதால அவரு மட்டும் தனியா போட்டியிட வெட்கமா இருக்குதாம்... வேணும்னா ஃப்ரியாவே அவரும் நம்ம கூட்டணியிலேயே சேர்ந்துக்கலாமான்னு கேக்குறாரு!"
------------------------------------------------------

புரட்சியாளன் முத்துக்குமாருக்குக் காணிக்கை!

2009-02-01T09:52:00.000-08:00

(ஈழத்தமிழர் ஆதரவுப் போராட்டத்திற்காக 29.1.2009 அன்று, சாஸ்திரி பவன் முன்பாக, தன்னுயிரையே தீக்கிரையாக்கிய புரட்சியாளன் முத்துக்குமாருக்கு இந்த கவிதை காணிக்கை!

என்னால் இயன்றவரை முத்துக்குமாரின் எழுத்துக்கள் அனைத்தையும் நகலெடுத்து மக்களுக்குப் பரவச் செய்யும் பணியை முத்துகுமாரின் இறுதி நிகழ்ச்சியிலேயே தொடங்கி விட்டேன். இதனை நமது கடமையாக நினைத்து அனைவரும் தொடர வேண்டுகிறேன்.)

முத்துக்குமார்!
ஈழ ஆதரவுப்போரில்
தமிழரின் தன்மானத்தை
ஏளனம் செய்தோரை
தன் மரணத்தால்
வாயடைக்கச் செய்தவன் நீ!

ஈழத்தமிழரின்
படுகொலைகள் கண்டு
மனம் பதறினாய்
இந்தியாவின்
பயங்கரவாத முகங்கண்டு
மனம்புழுங்கினாய்
உன் புழுக்கம் தீரவே
நீ குளித்தாயோ?
தீயில்
உன்னை நனைத்தாயோ?

உன்
கருகிய முகம் கண்டேன்
மூடாத உன் விழிகள்
ஒருகணம்
என்னோடும் பேசியது
"என்முன்னே
கூட்டத்தைப் பார்" என்றது...

ஆம்;
தன் வீட்டுத் துக்கமென
தூக்கம் தொலைத்த
மாணவர் கூட்டம் கண்டேன்!

உன்னைத் துருப்புச்சீட்டாக்க
உன் இருப்பையே
ஒருநாள் நீட்டித்த
மாணவர்தம்
ஆவேச முகமும் கண்டேன்!

நீ விரும்பிய தமிழர்கள்
இறுதியாய் உனைக்காண
அடக்கிய தமிழுணர்வெல்லாம்
வெடித்துச் சிதறக் கண்டேன்!

பிரபாகரன் எங்கோ இல்லை...
இங்கே இருக்கிறோமென
இறுமாப்போடு
பிரபாகரன் படந்தாங்கி
பெருமைபேசி
தமிழர்கள் உலவக் கண்டேன்!
எல்லாம்
நீ கொடுத்த தைரியம்தான்!

கட்சிக் கொடிகள்
தன் அடையாளந்தொலைத்து
கருமை பூசிக்கொண்டன
உனக்காக!

துதிபாடிகள் புடைசூழ
தன்னைத் தமிழனென்றும்
தானைத் தலைவனென்றும்
தம்பட்டமடித்து
தமிழால் பிழைத்தவர்கள்
தப்பிப் பயந்தோடிய
நிகழ்வு கண்டேன்!

காந்தியின் பெயராலே
தமிழனிடம் ஓட்டுவாங்கி
தமிழனுக்கே வேட்டுவைக்கும்
இந்திய இறையாண்மை
மயிர்களெல்லாம்
பிடுங்கி எறியப்பட்டு
பொசுக்கப்பட்ட
புரட்சி கண்டேன்!
தேர்தல் வரட்டும்
நேரில் வரட்டும்
செருப்படி நிச்சயம்!

வாக்களிக்கப்
பணம்வாங்கியே
பழகிப்போன தமிழ்ஜாதி
முதல்முறையாக
வெட்கப்பட்டது...
விலைபோக மறுத்த
உன் தந்தையைப் பார்த்து!

நீ
பற்ற வைத்த நெருப்பு
உன் தந்தையை மட்டுமா?
தமிழுலகம் முழுதுமன்றோ
தொற்றிவிட்டது!

உன்னை மட்டுமா பொசுக்கியது?
ஜாதிமதமென்றும்
கட்சியென்றும்
தமிழனைப் பிரித்தாண்ட
சூழ்ச்சியனைத்தையுமன்றோ
பொசுக்கியது!

திலீபனைப்போல்
ஈழத்தமிழர் வரலாற்றில்
உனக்கும்
ஓர் இடம் உண்டு!

தியாகி முத்துக்குமரனின் மரண வாக்குமூலம்... உங்கள் பார்வைக்கு!

2009-01-30T17:58:00.000-08:00

ஈழத்தமிழர் போராட்டத்திற்காக தன்னுயிரை, 29-01.2009 அன்று மாய்த்துக்கொண்ட தமிழன், தியாகி முத்துக்குமரன் வினியோகித்த துண்டறிக்கையைப் பதிந்துள்ளேன். இதில் பொதிந்துள்ள உண்மை, அனைவரையும் எழுப்பும் என்ற நம்பிக்கையுடன்...

அன்பார்ந்த உழைக்கும் தமிழ்மக்களே...

வணக்கம். வேலைக்குப் போகும் அவசரத்திலிருக்கும் உங்களை இப்படி சந்திக்க நேர்ந்ததற்கு நான் வருந்துகிறேன். ஆனால் வேறு வழியில்லை. என் பெயர் முத்துக்குமார். பத்திரிகையாளர் மற்றும் உதவி இயக்குநர். தற்சமயம் சென்னையில் உள்ள பத்திரிகை ஒன்றில் வேலை செய்து வருகிறேன்.

உங்களைப்போல் தான் நானும். தினமும் செய்தித்தாளையும், இணையத்தையும் பார்த்து பார்த்து, தினம் தினம் கொல்லப்பட்டு வரும் எம் சக தமிழர்களைக் கண்டு சாப்பிட முடியாமல், தூங்க முடியாமல், யோசிக்க முடியாமல் தவிக்கும் எத்தனையோ பேரில் ஒரு சாமானியன். வந்தாரை வாழ வைக்கும் செந்தமிழ் நாட்டில் சேட்டு என்றும், சேட்டனென்றும் வந்தவனெல்லாம் வாழ, சொந்த ரத்தம் ஈழத்தில் சாகிறது.

அதைத் தடுத்து நிறுத்துங்கள் என்று குரல் கொடுத்தால், ஆம் என்றோ இல்லை என்றோ எந்த பதிலும் சொல்லாமல் கள்ள மௌனம் சாதிக்கிறது இந்திய ஏகாதிபத்தியம். இந்தியாவின் போர் ஞாயமானதென்றால் அதை வெளிப்படையாகச் செய்ய வேண்டியதுதானே.. ஏன் திருட்டுத்தனமாக செய்ய வேண்டும்?

ராஜீவ்காந்தியைக் கொன்றார்கள் என்ற சொத்தை வாதத்தை வைத்துக்கொண்டு, சில தனிநபர்களின் பலிவாங்கல் சுயநல நோக்கங்களுக்காக ஒரு பெரும் மக்கள் சமூகத்தையே கொன்று குவிக்கத் துடிக்கிறது இந்திய அதிகார வர்க்கம். ராஜீவ் காந்தி கொலையில் விடுதலைப்புலிகள் மட்டும் குற்றம்சாட்டப்படவில்லை.

தமிழக மக்களையும் குற்றவாளிகள் என்று குற்றம்சாட்டியது ஜெயின் கமிஷன் அறிக்கை. அப்படியானால் நீங்களும் ராஜீவ்காந்தியைக் கொலை செய்த கொலைகாரர்கள்தானா?
ஜாலியன் வாலாபாக்கில் வெள்ளையன் கொன்றான் என்றார்களே, இவர்கள் முல்லைத் தீவிலும் வன்னியிலும் செய்வதென்ன? அங்கு கொல்லப்படும் குழந்தைகளைப் பாருங்கள்.
உங்கள் குழந்தைகள் நினைவு வரவில்லையா? கற்பழிக்கப்படும் பெண்களைப் பாருங்கள். உங்களுக்கு அதுபோன்ற வயதில் ஒரு தங்கையோ, அக்காவோ இல்லையா?

ராஜீவ் கொல்லப்பட்டபோது காங்கிரசின் முக்கிய தலைவர்கள் ஏன் அவருடன் இல்லை, கூட்டணிக் கட்சித் தலைவியான ஜெயலலிதா, தமிழ்நாட்டில் ராஜீவ் கலந்துகொள்ளும் ஆகப் பெரிய பொதுக்கூட்டத்தில் ஏன் பங்கெடுக்க போகவில்லை என்பதுபோன்ற கேள்விகள் கேட்கப்படாமலும், இவர்களால் பதில் சொல்லப்படாமலும் கிடக்கின்றன.

மக்களே யோசியுங்கள். இவர்கள்தான் உங்கள் தலைவர்களா? பணம், அடியாள் பலம் ஆகியவற்றைக் கொண்டு மிரட்டல் அரசியல் நடத்தி வரும் இவர்கள் நாளை நம்மீதே பாய மாட்டார்கள் என்பதற்கு என்ன நிச்சயம்? அப்படி பாய்ந்தால் யார் நம் பக்கம் இருக்கிறார்கள்?
கலைஞரா? நாடாளுமன்ற உறுப்பினர்கள் ராஜினாமா செய்வார்கள் என்று அப்பொழுதும் அவர் அறிவிப்பார். பிறகு, மத்திய அரசைப் புரிந்துகொள்வார்(?!).

பிறகு மறுபடி சரியான முடிவை எடுக்க வேண்டி சட்டமன்றத்தில் தீர்மானம் நிறைவேற்றுவார் - இந்த மாசம், இந்த வாரம், “இதுவரைக்கும் என்ன எவனும் தொட்டதில்ல” என்கிற வின்னர் பட வடிவேல் காமெடியைப் போல. காகிதம் எதையும் சாதிக்காது மக்களே!

இப்பொழுது, உலகத் தமிழினத் தலைவர் என்ற பட்டப்பெயரைச் சூடிக்கொள்ளவும், தமிழ்நாட்டில் இருக்கும் பணத்தையெல்லாம் தன் குடும்பத்திற்கே உரித்தாக்கவும் விரும்புகிற தேர்தல் காலத் தமிழர் கலைஞர் மக்களின் கோபத்தை எதிர்கொள்ள பயந்து மருத்துவமனையில் போய் ஒளிந்துகொண்டுள்ளார். தனது மந்திரிகளுக்கு அவசியப்பட்ட துறைகளுக்காக சண்டப்பிரசண்டம் செய்து சதிராடிய இந்த சூரப்புலி உண்மையில் தமிழுக்காகவோ, தமிழருக்காகவோ செய்ததென்ன?

ஒருமுறை அவரே சொன்னார், ''தேனெடுத்தவன் புறங்கையை நக்காமலா இருப்பா"னென்று. இவருடைய பம்மலாட்டத்தையெல்லாம் பார்த்தால் ரொம்பவே நக்கியிருப்பார் போலிருக்கிறேதே...

பட்டினிப் போராட்டத்தின் மூலம் களம் இறங்கியிருக்கும் சட்டக்கல்லூரி மாணவர்களே... உங்கள் போராட்டம் வெற்றிபெற சகதமிழனாக நின்று வாழ்த்துகிறேன்.
உங்களோடு களம் இறங்க முடியாமைக்கும் வருந்துகிறேன். ஈழத் தமிழர் பிரச்னை என்றில்லை, காவிரியில் தண்ணீர் விடச்சொல்லும் போராட்டமென்றாலும் சரி, தமிழ்நாட்டிற்காதவரான போராட்டம் எதுவாக இருந்தாலும் சரி, முதலில் களம் காண்பவர்கள் நீங்கள், வழக்கறிஞர்களும்தான். இந்த முறையும் நான்கு மாதங்களுக்கு முன்பாகவே களத்தில் இறங்கியவர்கள் இந்த இரண்டு தரப்பும்தான்.

உங்களுடைய இந்த உணர்வை மழுங்கடிக்கவே திட்டமிட்டு இந்திய உளவுத்துறை ஜாதிய உணர்வைத் தூண்டிவிட்டு, அம்பேத்கர் சட்டக்கல்லூரி அனர்த்தத்திற்கு வழிவகுத்திருக்கலாம் என்பது என் சந்தேகம்.

உலகம் முழுக்க மக்களுக்கான புரட்சிகரப் போராட்டங்களில் முன்கையெடுப்பவர்களாக இருந்தது மாணவர்கள் என்கிற ஜாதி தான். அதேபோல், தமிழ்நாட்டிலும் உங்களுக்கு முந்திய தலைமுறையொன்று இதுபோன்ற ஒரு சூழலில், இதுபோல் குடியரசு தினத்திற்கு முன்பு களம் கண்டுதான் காங்கிரஸ் உள்ளிட்ட தேசியக் கட்சிகளைத் தமிழ் மண்ணிலிருந்து விரட்டியடித்தது.
ஆக, வரலாற்று முக்கியத்துவம் வாய்ந்த ஒரு தருணம் உங்கள் கைகளுக்கு மறுபடியும் வந்து சேர்ந்திருக்கிறது. பொதுவாக உலக சரித்திரத்தில் இப்படியெல்லாம் நடப்பதில்லை. கடந்த முறை நடந்ததுபோல், உங்கள் போராட்டத்தின் பலன்களை சுயநலமிகள் திருடிக்கொள்ள விட்டுவிடாதீர்கள்.

போராட்டத்தின் பலன்களை அபகரித்து ஆட்சிக்கு வந்த தி.மு.க. முதலில் செய்த விசயம் மாணவர்கள் அரசியல் ஈடுபாடு கொள்ளக்கூடாது என சட்டம் போட்டதுதான். ஆட்சிக்கு வந்த அது, தமிழின உணர்வுகளை மழுங்கடித்து, ஒட்டுமொத்த தமிழினத்தையும் மகஜர் கொடுக்கும் ஜாதியாக மாற்றியது. அந்த மரபை அடித்து உடையுங்கள். மனு கொடுக்கச் சொல்பவன் எவனாக இருந்தாலும், அவனை நம்பாதீர்கள். நமக்குள்ளிருக்கும் ஜாதி, மதம் போன்ற வேறுபாடுகளை எரித்துக்கொள்ள இதுதான் தருணம்.

உண்ணாவிரதத்தையெல்லாம் தூக்கியெறிந்துவிட்டு களம் காணுங்கள். உண்மையில், இலங்கையில் இந்திய ராணுவ நடவடிக்கை என்பது தமிழர்களுக்கெதிரானது மட்டுமல்ல. ஒட்டுமொத்த இந்தியர்களுக்குமே எதிரானது. சிங்களச் சிப்பாய்களிடம் கற்றுக்கொள்கிற பாலியல் நுணுக்கங்களைத்தானே அவர்கள் அசாமில் அப்பாவிப் பெண்களிடம் பரிசோதித்துப் பார்த்தார்கள்!

விடுதலைப்புலிகளை ஒடுக்குவதற்கான சிங்கள வன்முறை நுணுக்கங்களைக் கற்றுக்கொண்டு வடகிழக்கு மாநிலப் போராளிகளிடம் பயன்படுத்திக் கூர் பார்த்தார்கள்! போதாதற்கு, ஹைட்டியில் சமாதானப் பணிக்காக அனுப்பப்பட்ட ஐ.நா.வின் ராணுவத்திலிருந்து இந்திய மற்றும் இலங்கை ராணுவம் அவரவர்களுடைய பாலியல் நடவடிக்கைகளுக்காக அடித்துத் துரத்தப்பட்டிருப்பதிலிருந்து என்ன தெரிகிறது - இந்தக் கூட்டணி கொள்கைக் கூட்டணியல்ல, பாலியல் கூட்டணி என்றல்லவா!

ஆக இந்திய - இலங்கை இராணுவக் கூட்டு என்பது இந்தியர்களின் அடிப்படை மனித உரிமைகளுக்கும் கூட எதிரானதாக இருப்பதால், அகில இந்திய அளவில் மாணவர்கள், ஜனநாயக அமைப்புகளையும் உங்கள் பின்னால் திரட்டுங்கள்.

இதையெல்லாம் மக்களே செய்ய முடியும். ஆனால், அவர்கள் சரியான தலைமை இல்லாமல் இருக்கிறார்கள். உங்கள் மத்தியிலிருந்து தலைவர்களை உருவாக்குகள். உங்கள் போராட்டத்தை சட்டக்கல்லூரி மாணவர்கள் என்ற இடத்திலிருந்து அனைத்து மாணவர்கள் என்று மாற்றுங்கள். உங்களிடமிருக்கும் வேகமும், மக்களிடமிருக்கும் கோபமும் இணைந்து தமிழக வரலாற்றை அடியோடு மாற்றட்டும். ஆன்பலம், பணபலம், அதிகார வெற்றியை உடைத்து எறியுங்கள். உங்களால் மட்டுமே இது முடியும்.

'நாங்கள் தமிழ் மாணவர்கள், தமிழ்நாட்டின் உயிரானவர்கள், இங்கு தமிழினம் அமைதிகொண்டிருந்தால் ஏடுகள் தூக்கி படிப்போம். எங்கள் தமிழர்க்கின்னல் விளைந்தால் எரிமலையாகி வெடிப்போம்' என்ற காசி அனந்தனின் பாடலை ஓர் அறிவாயுதமாக ஏந்துங்கள்.. என் உடலை காவல்துறை அடக்கம் செய்துவிட முயலும். விடாதீர்கள்.
என் பிணத்தைக் கைப்பற்றி, அதை புதைக்காமல் ஒரு துருப்புச் சீட்டாக வைத்திருந்து போராட்டத்தைக் கூர்மைப்படுத்துங்கள். எனக்கு சிகிச்சையோ, போஸ்ட்மார்டமோ செய்யப்போகும் தமிழ்நாடு மருத்துவக் கல்லூரி மாணவர்களே.. உங்கள் கையால் அறுபட நான் புண்ணியம் செய்திருக்க வேண்டும்.

காரணம், அகில இந்திய அளவில், மருத்துவக் கல்வியில் இட ஒதுக்கீட்டுக்கு எதிராக உயர்சாதி மாணவர்கள் போராடிக்கொண்டிருக்க, தன்னந்தனியாக நின்று, மருத்துவக் கல்வியில் இடஒதுக்கீட்டுக்கு ஆதரவாகப் போராடியர்களல்லவா நீங்கள்? எனக்கு செய்வதெல்லாம் இருக்கட்டும். நம் சகோதரர்களான ஈழத்தமிழர்களுக்கு உங்கள் பங்குக்கு என்ன செய்யப் போகிறீர்கள்?

தமிழீழம் என்பது தமிழழத்தின் தேவை மட்டுமே அல்ல, அது தமிழகத்தின் தேவையும் கூட காரணம், இராமேஸ்வரம் மீனவர்கள், உலகில் ஆடு, மாடுகளைப் பாதுகாப்பதற்குக் கூட சட்டமும், அமைப்புகளும் இருக்கின்றன. இராமேஸ்வரம் தமிழனும், ஈழத்தமிழனும் மாட்டைவிட, ஆட்டைவிடக் கேவலமானவர்கள்? எல்லை தாண்டி போகும் மீனவர்கள், புலிகள் என்ற சந்தேகத்தின் பேரில் தாக்கப்பட்டு வருவதாக இந்திய மீடியா திட்டமிட்டு பிரச்சாரம் செய்து வருகிறது. இவர்களெல்லாம் செய்தித்தாளே படிப்பதில்லையா?
சென்னையின் கடற்கரைகளில் அடிக்கடி தைவான் நாட்டை சேர்ந்த மீனவர்கள் வழிதெரியாமல் வந்த்வர்கள் என்று கைது செய்யப்படுகிறார்கள். பல ஆயிரக்கணக்கான கிலோமீட்டர்கள் தூரத்திலிருக்கும் தைவான் மீனவன் வழிதவற முடியுமென்றா, வெறும் பன்னிரெண்டு மைல் தூரத்திற்குள் இராமேஸ்வரம் தமிழன் வழிதவறுவது நம்புவது மாதிரியில்லையாமா?

தமிழ்நாட்டில் வாழ்ந்து வரும் வெளிமாநிலங்களைச் சேர்ந்த சகோதர்களே...
உங்கள் சொந்த மாநிலத்தில் கூட இல்லாத நிம்மதியோடும், பாதுகாப்போடும் வாழக்கூடிய மாநிலம் தமிழ்நாடு தான் என்பது உங்களுக்கு அனுபவத்தால் தெரிந்திருக்கும். நாங்கள் இன்று பெரும் இக்கட்டை எதிர்நோக்கியிருக்கிறோம்.

ஈழத்திலிருந்துக்கும் எங்கள் சகோதரர்கள் இந்தியர் என்னும் நம் பெயரைப் பயன்படுத்திதான் நம் அரசால் கொலை செய்யப்படுகிறார்கள். இந்தப் போராட்டத்தில் நாங்கள் தனித்துவிடப்படுவதை இந்திய அரசு விரும்புகிறது. அப்படி ஆக்கக்கூடாதென நாங்கள் விரும்புகிறோம். ஆகவே, போராடிக்கொண்டிருக்கும் எங்கள் சகோதரர்களுக்கு உங்கள் ஆதரவும் உள்ளதென மத்திய அரசுக்குத் தெரியப்படுத்துங்கள்.

அரசுகளில் அங்கம் வகிக்கக்கூடிய உங்கள் தேசிய இனங்களைச் சேர்ந்தவர்களை எம் கரத்தை பலப்படுத்துவதோடு, எதிர்காலத்தில், ஒரு நவநிர்மாண் சேனாவோ, ஸ்ரீராம் சேனாவோ தமிழ்நாட்டில் உருவாகவிருக்கும் ஆபத்தைத் தவிர்க்கும் என்பது என் கருத்து.
தமிழ்நாடு காவல்துறையிலிருக்கும் இளைஞர்களே...

உங்கள் மீது எனக்கு இருக்கும் மதிப்பு கொஞ்சம் நஞ்சமல்ல, காரணம், தமிழுக்காக மற்றவர்கள் என்ன செய்தார்களோ, அலுவலர்களை “ஐயா” என அழைப்பது போன்ற நடைமுறை ரீதியில் தமிழை வாழ வைத்துக்கொண்டிருப்பவர்கள் நீங்கள்தான்.
மக்களுக்காகப் பாடுபடவேண்டும், சமூக விரோதிகளை ஒழுத்துக்கட்ட வேண்டும் என்பதுபோன்ற உன்னத நோக்கங்களுக்காகத்தான் நீங்கள் காவல்துறையில் இணைந்திருப்பீர்கள் என்று நம்புகிறேன். ஆனால், அதை செய்ய விடுகிறதா ஆளும் வர்க்கம்? உங்களை சிறுசிறு தவறுகள் செய்ய விடுவதன் மூலம் தன்னுடைய பெருந்தவறுகளை மறைத்துக்கொள்ளும் அதிகார வர்க்கம், உங்களை, எந்த மக்களுக்காகப் பாடுபட நீங்கள் விரும்பினீர்களோ, எந்த மக்களுக்காக உயிரையும் கொடுக்கலாம் என்று தீர்மானித்தீர்களோ, அந்த மக்களுக்கெதிராகவே, பயிற்றுவிக்கப்பட்ட அடியாள்களாக மாற்றுகிறது.

டெல்லி திகார் ஜெயிலைப் பாதுகாப்பது தமிழக போலீஸ்தான். இந்தியாவில் பழமையான காவல்துறையான தமிழக காவல்துறை சிறப்பாக செயல்பட்டு வரும் காவல்துறைகளில் ஒன்று. ஆனால் அந்த மதிப்பை உங்களுக்குக் கொடுக்கிறதா இந்திய அரசாங்கம்! மத்திய அமைச்சர் ப.சிதம்பரம் தமிழகம் வந்து திரும்பிப் போகையில், சென்னை விமான நிலையத்தில், அவருக்கான பாதுகாப்பை வழங்க அனுமதிக்க மறுத்திருக்கிறார்கள் மத்திய காவல் அதிகாரிகள்.

ஏனென்று கேட்டதற்கு, ராஜீவ் காந்தியை நீங்கள் பாதுகாத்த லட்சணம் தான் தெரியுமே என்று கிண்டல் செய்திருக்கிறார்கள். ராஜீவ்காந்தியைத் தமிழக காவல்துறையால் காப்பாற்ற முடியவில்லை என்பது எவ்வளவு உண்மையோ, அதே அளவுக்கு உண்மை, ராஜீவோடு இறந்தவர்களில் பலர் அப்பாவி போலீஸ்காரர்கள் என்பது. உங்கள் அர்ப்பணிப்புணர்வு கேள்விகளுக்கப்பாற்பட்டது. ஆனால் மேற்படி வெண்ணெய் வெட்டி வீரரர்கள் - அதுதான், இந்திய உளவுத்துறை - ராஜீவின் உயிருக்கு ஆபத்து இருக்கிறது என்ற தகவலை அறிந்தபோதும் மெத்தனமாக இருந்தது என்பது பின்னர் அம்பலமானதல்லவா... இதுவரை காலமும் நீங்கள் அப்பாவி மக்களுக்கெதிராக இருந்தாலும் தமிழகத்தின் பெருமைகளில் ஒன்றாகத்தான் இருக்கிறீர்கள்.

வரலாற்று முக்கியத்துவம் வாய்ந்த இந்த தருணத்தில், நீங்கள் மக்கள் பக்கம் இருந்தால் மட்டுமே மக்களிடம் இழந்திருக்கிற பெருமையை மீட்டெடுக்க முடியும். ஒருமுறை சக தமிழர்களுக்காக அர்ப்பணித்துப்பாருங்கள். மக்கள் உங்களை தங்கத்தட்டில் வைத்து தாங்குவார்கள். தமிழனின் நன்றி உணர்ச்சி அளவிடற்கரியது. தன்னுடைய சொந்தக்காசை வைத்து அணை கட்டிக்கொடுத்தான் என்பதற்காகவே அவனுக்கு கோயில் கட்டி, தன் பிள்ளைகளுக்கு அவன் பெயரை வத்துக் கொண்டாடிக்கொண்டிருக்கிறான் முல்லையாற்றின் மதுரை மாவட்டத்தமிழன்.

நீங்கள் செய்ய வேண்டியதெல்லாம், கொந்தளிக்கப் போகும் தமிழகத்தில், மத்திய அரசு அதிகரிகளுக்கு ஒத்துழைக்க மறுப்பது, ரா, சி.பி.ஐ போன்ற அமைப்புகளைச் சேர்ந்தவர்களை உள்ளூர் மக்களுக்கு அடையாளம் காட்டுவதும்தான். இதை மட்டுமாவது செய்யுங்கள். மற்றதை மக்கள் பார்த்துக்கொள்வார்கள்.

களத்தில் நிற்கும் தமிழீழ மக்களே, விடுதைலைப்புலிகளே...

அனைத்துக் கண்களும் இப்போது முல்லைத்தீவை நோக்கி. தாய்த் தமிழகம் உணர்வுபூர்வமாக உங்கள் பக்கம்தான் நிற்கிறது. வேறு ஏதாவது செய்ய வேண்டும் எனவும் விரும்புகிறது. ஆனால் என்ன செய்வது உங்களுக்கு அமைந்தது போன்ற உன்னத தலைவன் எங்களுக்கில்லையே... ஆனால், நம்பிக்கையை மட்டும் கைவிடாதீர்கள். இதுபோன்ற கையறுகாலங்கள்தான்.

தமிழகத்திலிருந்து அப்படி ஒருவர் இந்தக் காலத்தில் உருவாகலாம் அதுவரை, புலிகளின் கரங்களை பலப்படுத்துங்கள். 1965ல் நடந்த இந்தி எதிர்ப்புப் போரை சில சுயநலமிகளின் கையில் ஒப்படைத்ததால்தான் தமிழக வரலாறு கற்காலத்திற்கு இழுபட்டுள்ளது. அந்தத் தவறை நீங்கள் செய்து விடாதீர்கள்.

அன்பிற்குரிய சர்வதேச சமூகமே, நம்பிக்கைக்குரிய ஒபாமாவே,

உங்கள் மீது எங்களுக்கு இன்னும் நம்பிக்கை இருக்கிறது. ஆனால், இறையான்மை கொண்ட ஒரு குடியரசு தம் குடிமகனை இன ஒதுக்கல் மூலமாக கொடுமைப்படுத்தாது என்பதற்கு எந்த உத்தரவாதமும் கிடையாது. வசதிக்காக அமெரிக்காவின் கடந்த காலத்தையே எடுத்துக்காட்டாக சொல்லலாம்.

உலகப்புகழ் பெற்ற குத்துச்சண்டை மாவீரன் முகமதலி சொன்னானே, என் சருமத்திலிருக்கும் கொஞ்ச வெண்மையும் கற்பழிப்பின் மூலமாகவே வந்திருக்குமென்று... நீங்கள் அமைதியாக இருக்கும் வரை இந்தியா வாயே திறக்காது.

ஒட்டுமொத்த தமிழர்களும் அழிக்கப்பட்ட பிறகு வேண்டுமானால் அது நடக்கும். அதுவரை, இந்தியாவின் வாயைப் பார்த்துக்கொண்டிருக்கப் போகிறீர்களா?

வன்னியில், விடுதலைப்புலிகளூக்கு எதிரான போர்தான் நடக்கிறது என்கிறார்கள். புலிகள் மக்களைக் கேடயமாகப் பயன்படுத்துகிறார்காள் என்கிறார்கள். அப்படியானால் அரசு சொன்ன பகுதிக்கு வந்த மக்களை ஏன் கொலை செய்தார்கள்? இது ஒன்று போதுமே, தமிழ்மக்கள் விடுதலைப்புலிகளைச் சார்ந்து நின்றாலும் சரி, இலங்கை அரசைச் சார்ந்து நின்றாலும் சரி, தமிழர்கள் என்ற காரணத்திற்காகவே அவர்கள் கொல்லப்படுகிறார்கள் என்பதற்கு. இது இனப்படுகொலை இல்லையா?

இந்தியா, பாகிஸ்தான், சீனா ஆயுதம் கொடுத்தும், ஜப்பான் பணம் கொடுத்தும், கூடுதலாக, இந்தியா நாட்டாமை செய்தும் தமிழர்களைக் கொல்கின்றனரென்றால். நீங்கள் உங்கள் மெளனத்தின் மூலமாகவும், பாராமுகத்தின் மூலமாகவும் அதே கொலையைத்தான் செய்துகொண்டிருக்கிறீர்கள் என்பதை ஏன் உணரவில்லை?

ஆயுதம் தாங்கி போராடுவதால் மட்டுமே யாரும் தீவிரவாதியாகிட மாட்டார்கள். அறத்திற்கே அன்பு சார்பென்ப அறியார். மறத்திற்கும் அஃதே துணை என்று பாடியுள்ளான் எங்கள் திருவள்ளூவர்.

புலிகள் ஆயுதங்களைக் கீழே போட வேண்டும் என்கிறார் ஜெயலலிதா - என்னவோ பிரச்சினையே புலிகள் ஆயுதம் எடுத்ததால்தான் வந்தது என்பதைப் போல.. உணமையில், புலிகள் தமிழீழ இன அழிப்பிலிருந்து உருவாகி வந்தவர்களே தவிர, காரணகர்த்தாக்கள் அல்லர் (they are not the reason: just an outcome)

இந்திய அரசு இந்தப் பிரச்சினையில் ஈடுபட்டிருப்பது வெளிப்படையாகாத வரை, இலங்கைப் பிரச்சினை உள்நாட்டுப் பிரச்சினை. அதில் தலையிட முடியாது என்றது.

சீனா, பாகிஸ்தான் அமெரிக்கா போன்ற நாடுகள் இலங்கையில் ஆதிக்கம் பெறுவதைத் தடுப்பதற்காக செய்வதாகச் சொன்னது. நாடாளுமன்றத்தில் தாக்குதல் நடத்திய, மும்பை தொடர்வெடிகுண்டுகள், பிறகு அண்மையில் நடந்த தாக்குதல் எனப் பலவாறாக இந்திய மக்களைக்கொன்று குவித்த பாகிஸ்தானோடு இணைந்து கொண்டு தமிழர்களைக் கொன்று குவிக்கிறது.

அப்படியானால், பாகிஸ்தானின் இந்திய மீதான பயங்கரவாதமென்பது இந்தியா-பாகிஸ்தான் இருதரப்பு அதிகார வர்க்கங்களும் தங்கள் மக்களைச் சுரண்ட பரஸ்பர புரிதலுடன் உருவாக்கிக் கொண்ட ஒன்று என்ற எம் சந்தேகம் ஒருபக்கம் இருக்க, இப்போது, விடுதலைப்புலிகள் தீவிரவாதிகள் அதனால்தான் சண்டை என்கிறது. ராஜீவ் காந்தியைக் கொன்றார்கள் என்கிறது.
ராஜீவ்காந்தி ஒரு கவுன்சிலரோ, மாவட்டச் செயலாளரோ அல்ல. அவரை ஏற்கனவே ஒருமுறை கொலை செய்யும் முயற்சி இலங்கையில் நடைபெற்றிருந்த போதும் அந்தக் கொலைகாரன் விசாரிக்கப்படவில்லை. ராஜீவ்காந்தியைக் கொல்ல முயன்ற அந்த சிங்கள வீரனையும் குற்றம் சாட்டப்பட்டவர்களாக இணைத்துக்கொண்டு மறுபடியும் விசாரிக்கப்பட வேண்டும் என்பது என் கோரிக்கைகளில் ஒன்று.

ராஜீவ் மீது புலிகளுக்கு வருத்தம் இருந்திருக்கலாமே தவிர, கோபம் இருந்திருக்க வாய்ப்பில்லை. காரணம், ராஜீவ் இந்திராவின் புதல்வர். இந்திரா, தமிழீழத்தின் சிறுதெய்வங்களில் எம்.ஜி.ஆருக்குப் பக்கத்திலிருப்பவர்.

இந்தியா சொல்லும் காரணங்கள் அடிக்கடி மாறுவதிலிருந்தே இந்தியா நியாயத்திற்குப் புறம்பாகத்தான் இந்தப்போரில் ஈடுபட்டிருப்பது அம்பலமாகி இருக்கிறது. இப்படிப்பட்ட ஒரு சூழலில் நீங்கள் ஏன் நேரடியாகத் தலையிடக்கூடாது?

புலிகள் போர்நிறுத்தத்தைப் பயன்படுத்தி ஆயுதம் குவிக்கிறார்கள் என்றது இலங்கை. சந்திரிகாவோ, ரணிலோ, மகிந்தாவோ கடந்த காலங்களில் ஒரு கடவுளாக அல்ல, மனிதர்களாகக்கூட நடந்துகொண்டதில்லை. இவர்கள் ஒரு நிர்பந்தத்தின் பெயரில் போர் நிறுத்தத்திற்கு ஒப்புக்கொண்டு விட்டார்கள் என்பதால் மட்டுமே போராளிகள் ஆயுதங்களை ஒப்படைத்துவிட வேண்டும். புனரமைப்புப் பணிகளில் ஈடுபடக்கூடாது என்று எதிர்பார்ப்பது என்னவகை நியாயம்?

தாங்கள் நேர்மையாக நடந்துகொள்வோம் என்ற நம்பிக்கையை உண்டாக்குவது மூலமாக மட்டுமே போராளிகளை-ஆயுதத்தைக் கீழே வைக்கச்செய்ய முடியும். கடந்த கால அரசுகள் எவையும் அப்படி செயல்படவில்லை. உதாரணம் ரணில்- கருணா.

ஆனால், புலிகள் போர்நிறுத்தத்தைப் பயன்படுத்திக்கொண்டு செய்தது ஆயுதம் வாங்கியது மட்டுமல்ல, அது காலாகாலமாக நடப்பதுதானே- ஓர் அரசு நிர்வாகத்தையே உருவாக்கியுருக்கிறார்கள். சர்வதேசத்தின் கண்களில் இது தீவிரவாதமா? அப்பாவித் தமிழர்களைக் காப்பதற்காகத்தான் போரிடுவதாக பசப்புகிறது இந்தியா.

ஆயுத தளவாடங்களும், உளவு விமானங்களும்தான் இலங்கை போகின்றனவே தவிர, இந்தியாவால் அனுப்பப்பட்ட ஒரு “பாராசெட்டமால்” மாத்திரையைக் காட்டச் சொல்லுங்கள் பார்க்கலாம். இந்த லட்சணத்தில், தமிழீழ மக்களுக்கான வசதிகளை இலங்கை அரசு செய்யுமாம். அதற்கு இந்தியா உதவுமாம்... வேலிக்கு ஓணான் சாட்சி!

இப்போது சர்வதேச செஞ்சுலுவைச் சங்கத்தின் ஆம்புலன்ஸ்களைத் தாக்கினார்களே, அவர்களும் விடுதலைப்புலிகளா? ப்ரான்சின் 17 மனித உரிமையாளர்களைக் கொலை செய்தார்களே, அவர்களும் விடுதலைப்புலிகளா? சீனாவின் டாங்கிகள், இந்தியாவின் உளவு விமானங்கள், பாகிஸ்தானின் ஆர்டிலரிகள் மட்டுமல்ல... இப்போது எம்மக்களைக் கொலைசெய்து வருவது சர்வதேச சமூகத்தின் மெளனமும்தான் என்பதை எப்போது உணர்வீர்கள்-நியாயத்தின்பால் பெருவிருப்பு கொண்ட ஒரு மக்கள் சமூகம் பூமியிலிருந்து முற்றாகத் துடைத்தழிக்கப்பட்ட பிறகா?

அபாரிஜின்கள், மாயா, இன்கா வரிசையில் நாங்களும் சேர்க்கப்படுவது உங்கள் நோக்கமென்றால், எங்கள் பழங்கதைகள் ஒன்றின்படி ஒவ்வொருநாளும் ஏதேனும் ஒரு வீட்டிலிருந்து ஒருவர் வந்து உங்கள் முன்னால் தற்கொலை செய்து கொள்கிறோம்... எங்கள் சகோதரிகளையும், குழந்தைகளையும் விட்டுவிட்டுச் சொல்லுங்கள். தாங்க முடியவில்லை.
அவர்களெல்லாம் மனமார சிரிப்பதை ஒருநாள் பார்ப்போம் என்ற நம்பிக்கையில்தான் நாங்கள் போராடிக் கொண்டிருப்பதே. ஒரு பேச்சுக்கு ஒத்துக்கொள்வதென்றாலும் கூட, விடுதலைப்புலிகள் தண்டிக்கப்பட வேண்டியவர்கள் என்றாலும் அப்படி ஒரு தண்டனையை வழங்கும் யோக்கியதை இந்தியாவுக்கோ, இலங்கைக்கோ கிடையாது.

காலம் கடந்து வழங்கப்படும் நீதி அநீதியைவிடக் கொடுமையானது.

1. இந்தியா உடனடியாக தமிழீழத்தின் பகுதிகளிலிருந்து தன் துருப்புகளைத் திரும்பப் பெற்றுக்கொள்வதோடு, மேற்கொண்டு செயற்கைக்கோள் உதவிகள், ராடார் போன்ற உதவிகளைச் செய்யக்கூடாதென்று சர்வதேச சமூகத்தால் கண்டிக்கப்பட வேண்டும். இலங்கையோடு இந்தியா அரசு நடந்தும் முக்கியத்துவமற்ற பேச்சுப்பரிமாற்றங்கள்கூட சர்வதேச சமூகம் மூலமாகவே நடக்க வேண்டும். தமிழக மக்களிடமும், உலகெங்கும் பரந்து வாழும் தமிழீழத்தாரிடமும் இந்தியா பகிரங்க மன்னிப்பு கோர வேண்டும்.

2. ஐநா பொதுச்செயலாளரான பான் கி மூன், தொடர்ந்து தன் தாயகமான சீனாவிற்கு ஆதரவான நிலைப்பாட்டிலிருந்து, ஒருதலைப்பட்சமாக செயல்பட்டு வருவதால், ஈழம் தொடர்பான முடிவெடுக்கும் அதிகாரம் அவருக்கு வழங்கப்படக்கூடாது.

3. இலங்கை அரசு எந்தெந்த நாடுகளிடமெல்லாம் கோரப்பட்டு புலிகள்மீது தடை விதிக்கப்பட்டதோ அந்தந்த நாடுகளில் புலிகள் மீதான தடை நீக்கப்பட்டு, தடை செய்யப்பட்ட அமைப்பின் உறுப்பினர் என்ற குற்றத்திற்காக சிறையிலிருக்கும் அதன் உறுப்பினர்கள் எதுவித நிபந்தனையுமற்று உடனடியாக விடுதலை செய்யப்பட வேண்டும்.

4. புலிகளின் உறுப்பினர்கள் மீதான பாஸ்போர்ட் தொடர்பான குற்றங்கள் மன்னிக்கப்பட்டு, அவர்கள் விடுதலை செய்யப்பட வேண்டும்.

5. புலிகளோடு தொடர்புடையது என்னும் குற்றச்சாட்டின் பேரில் தடை செய்யப்பட தொழில் நிறுவனங்களின் உரிமம் மீண்டும் அளிக்கப்படுவதோடு, தக்க நட்ட ஈடும் வழங்கப்பட வேண்டும்.

6. ராஜீவ்காந்தி கொலை வழக்கு இண்டர்போலால் விசாரிக்கப்பட்டு, உண்மையான குற்றவாளிகள் இனம்காணப்பட வேண்டும்.

7. பிரணாப் முகர்ஜி, கோத்தபாய ராஜபக்க்ஷே, சந்திரிகா, உதயணகார, கேகலிய ரம்புக்வெல, பசில்ராஜப்க்ஷ மகிந்த, பொன்சேகா போன்றோர் நார்கோ அனாலிசிஸ் சோதனைக்குப்பட வேண்டும்.

8. அமைக்கப்படபோகிற தமிழீழத்தை அங்கீகரிக்கிற உரிமையை மட்டுகே சர்வதேசம் மேற்கொள்ளலாமே தவிர, அது யாரின் தலைமையில் அமையவேண்டும என்பதை தமிழீன மக்கள் தான் முடிவுசெய்வார்கள்.

9. புலிகள் கை பலவீனமான நேரத்தில், மலையக மக்கள் மீது நடந்த வந்தாக்குதல், எதிர்காலத்தில் அப்பகுதிகளில் மீண்டும் ஒரு பாரிய இன அழிவு ஏற்படுத்தப்படுமோ என்ற அச்சத்தை ஏற்படுத்தியிருப்பதால், மலையக மக்கள் தமிழீழத்தோடு இணைய விரும்புகிறார்களா என்பதை வாக்கெடுப்பு மூலம் அறிந்து அதன்படி செயல்பட வேண்டும் இந்த விசயத்தில் மலையக மக்களின் முடிவே இறுதியானது.

10. சென்னையில், குடிபோதையில் அப்பாவித் தமிழர்கள் மீது துப்பாக்கிப் பிரயோகம் செய்து, நீதிமன்றத்தால் தண்டிக்கப்பட்ட டக்ளஸ் தேவானந்தாவின் தண்டணைக்காலம் பூர்த்தியாகும் காலத்திற்குள் இலங்கைக்குத் தப்பிச்சென்று விட்டதால், அவர் கைது செய்யப்பட்டு, தமிழக போலிசார் வசம் ஒப்படைக்கப்பட வேண்டும்.

11. பத்திரிகையாளரான லசந்தவின் கொலைக்குக் காரணமான அனைவரும் தண்டிக்கப்பட வேண்டும்.

12. தமிழ்நாட்டிற்கு தஞ்சம் புகுந்திருக்கும் சிங்கள பத்திரிகையாளர்களுக்கு தகுந்த பாதுகாப்பு வழங்கப்பட வேண்டும்.

13. தமிழ்நாட்டிற்கு அகதிகளோடு அகதியாக வந்த சிங்களத்தம்பதியர் மீதான பாஸ்போர்ட் குற்றச்சாட்டு நீக்கப்பட்டு, அவர்களும் அகதிகளாக அங்கீகரிக்கப்பட வேண்டும்.

14. சுட்டுக் கொலை செய்யப்பட்ட தமிழக மீனவர்களின் குடும்பங்களுக்கான வாழ்வாதரங்கள் உறுதி செய்யப்பட வேண்டும்.

அநீதிகளுக்கெதிரான உங்கள் சகோதரன்,
கு.முத்துக்குமார்,
கொளத்தூர், சென்னை-99

அருமைத்தமிழ் மக்களே,

அநீதிகளுக்கெதிரான போராட்டத்தில் நம் சகோதர்களும், பிள்ளைகளும் அறிவாயுதம் ஏந்தியிருக்கிறார்கள். நான் உயிராயுதம் ஏந்தியிருக்கிறேன். நீங்கள் நகலாயுதம் ஏந்துங்கள். ஆம், உங்கள் கையில் கிடைத்திருக்கும் இந்தத் துண்டறிக்கையை நகலெடுத்து, உங்கள் நண்பர்கள், உறவினர்கள், மாணவர்கள் வசம் கொடுத்து, போராட்டத்திற்கான ஆதரவைப் பெருகப் பண்ணுங்கள் நன்றி.

கு.முத்துக்குமார்,
கொளத்தூர், சென்னை-99

உலை கொதிக்குது உள்ளே!

2009-01-28T10:29:00.001-08:00

அகில இந்திய
கட்சித் தலைமைகாட்டும்
மாநிலத் தலைவனை
ஏற்க மறுக்கும்
கோஷ்டிகளின் கூடாரம்
பேசுகிறது
இந்திய இறையாண்மையை!

தினம்தினம்
செத்துமடியும் தமிழனுக்கு
அய்யகோ! போட்டுவிட்டு
ஆஸ்பத்திரியில் ஓய்வெடுக்கும்
ஒப்பற்ற தலைவரோ
பொறுத்திருக்கச் சொல்கிறார்
செயற்குழு கூடும்வரை!

இருப்பைக் காட்டிக்கொள்ள
கறுப்பு பேட்ச்
அணிய ஆணையிட்ட
கறுப்பு எம்ஜியாரோ
சுறுசுறுப்பாக
டூயட் ஆடியபடி!

வெளியுறவுத்துறை
செல்லுமுன்னே
விளையாட்டுத்துறை
சென்றுவிட்டது...
ஒருபக்கம்
ஓரணியில் நின்று
குண்டுவீசிவிட்டு
மறுபக்கம்
எதிரெதிராய் நின்று
வேடிக்கை காட்டுது!

இத்தனைக்கும் நடுவே
அடிக்கடி
அடிதடிக்குப் பழியாகும்
சட்டக்கல்லூரி மாணவர்கள்
இம்முறை
அஹிம்சைக்குப் பலியாக
திலீபனை நினைவுபடுத்தியபடி...

உலை கொதிக்கத்
தாளமிடும் தட்டுபோல்
கூப்பாடு மட்டும் தமிழகத்தில்
கொள்ளி
இன்னும் எரிகிறது...
உலை கொதிக்குது உள்ளே!

ஈழத்திற்காக ஓர் ஆர்ப்பாட்டம்...

2009-01-26T08:59:00.000-08:00

இன்று (ஜனவரி 26,09) மக்கள் கலை இலக்கியக் கழகம் மற்றும் அதன் சார்பு இயக்கங்கள் இணைந்து நடத்திய ஈழத்தமிழர்கள் மீது இனவெறித் தாக்குதல் நடத்தும் இலங்கை அரசுக்கும், அதற்கு முழுக்க பக்கபலமாக இருந்து ஆயுத உதவி செய்யும் இந்திய அரசுக்கும் எதிராக ஆர்ப்பாட்டம் நடத்துவதாக வந்த குறுஞ்செய்தியையடுத்து நானும் அதில் கலந்துகொள்ளச் சென்றேன். சைதாப்பேட்டை பேருந்து நிலையத்திற்கு எதிர்ப்புறத்தில் ஆர்ப்பாட்டம் நடைபெற்றது. இலங்கைப் பிரச்சனையில் மற்ற தமிழகக் கட்சிகளிலிருந்து சற்று மாறுபட்ட கொள்கை கொண்டவர்களாக என்னால் புரிந்துகொள்ளப்பட்ட மகஇகவினரின் ஆர்ப்பாட்டத்தில் கலந்து கொண்டதன்மூலம், இலங்கைப் பிரச்சனையில் இந்திய அரசின் செயல்பாடு குறித்து சரியான கோணத்தில் சில விவரங்களைத் தெரிந்து கொள்ள முடிந்தது. நான் தெரி(ளி)ந்துகொண்ட செய்திகளை உங்களுடன் பகிர்ந்து கொள்வது என் கடமையென்பதால் இந்த கட்டுரை.

இந்த ஆர்ப்பாட்டத்தில் கலந்துகொண்ட தோழர்.மருதையன் அவர்களின் உணர்ச்சிகரமான பேச்சிலிருந்து நான் புரிந்துகொண்ட செய்திகள்:
இந்திய அரசு வர்த்தகரீதியாக இலங்கை அரசை ஆதரிக்கும் நிலைப்பாட்டைப் போட்டுடைத்தார். தமிழக அரசியல்கட்சிகளால் பரவலாகப் பேசப்படும், தவறான வழிகாட்டுதலால்தான் மன்மோகன்சிங் இலங்கைக்கு ஆதரவாகச் செயல்படுகிறார் என்ற கருத்து தவறென்பதை எடுத்துரைத்தார்.

இந்தியப் பணமுதலைகள் அம்பானி, டாடா போன்றவர்களின் தேயிலைத் தோட்டம், சிமெண்டுத் தொழிற்சாலை உள்ளிட்ட பல்வேறு வர்த்தகங்கள் பிரச்சனையேதுமின்றி தொடர இலங்கை அரசை அனுசரித்து, அதனைத் தனது கட்டுக்குள் வைத்திருப்பது என்ற இந்திய அரசின் வெளியுறவுக் கொள்ளையே இதற்கான் மூலகாரணம் என்ற விசயத்தை விளக்கினார். இதற்குச் சரியான உதாரணமே, சமீபத்தில் பணமுதலைகளுக்கு ஆதரவாக சிங்கூரில் இந்திய மக்களின்மீதே நடத்தப்பட்ட துப்பாக்கிச்சூடு. தனது கட்டுக்குள் வராத ஒரே காரணத்தினால் அமைதிப்படை என்ற பெயரில் இந்திய ராணுவத்தை அனுப்பி தமிழ்ப் போராளிகள்மீது நடத்திய தாக்குதலையும், அதையொட்டி தமிழக மக்களைக் கொடூரமாகப் படுகொலை செய்த, தமிழ்ப் பெண்களை வன்புணர்வு செய்து கொன்றுகுவித்த ராணுவ வெறியாட்டத்தையும் நினைவுபடுத்தினார்.

இன்றுவரை இந்திய அரசின் ஆயுத உதவியுடன் நடைபெற்றுவரும் தமிழ்ப் போராளிகள் மீதான தாக்குதலைத் தடுத்து நிறுத்தச் சொல்லி வெளியுறவுத்துறை அமைச்சரை இலங்கைக்கு அனுப்பச் சொல்வது கேலிக்கூத்தான விசயமென்றும், இதுவிசயமாக மன்மோகன்சிங் இலங்கைக்குச் சென்றாலும் போரைத் தொடர்ந்து நடத்தத்தான் வலியுறுத்துவார் என்ற எதார்த்தத்தைப் புரியவைத்தார். எனவே இந்திய அரசுக்கு எதிராகப் போராடும் அனைவரும், இந்திய அரசை இலங்கைப் பிரச்சனையில் தலையிடக்கூடாதென வலியுறுத்திப் போராடுவதே சரியான நிலைப்பாடு என்பதை எடுத்துரைத்தார். இதைத் தமிழகக் கட்சிகள் புரிந்துகொண்டால் சரி.

ஈழ மக்களுக்கு எதிரான போராட்டத்தில் இலங்கை ராணுவத்தின் வெற்றியைப் பெருமிதத்தோடு செய்தி வெளியிடும் இந்துராம், ஈழத்தமிழர்களுக்கு எதிராகக் கருத்துக் கொண்ட சோ, போரில் ராணுவத்தாக்குதலால் அப்பாவி மக்கள் கொல்லப்படுவது தவிர்க்கமுடியாதது எனக்கூறி ஈழத்தமிழர்களைக் கிள்ளுக்கீரையாகக் கருதும் ஜெயலலிதா, அமெரிக்க ஏஜெண்ட் சு.சாமி, ராஜீவ்காந்தியின் மரணத்தால் சென்டிமென்ட் அரசியல் நடத்தும் காங்கிரஸ் என அனைவரின் முகத்திரையையும் கிழித்தார்.

விடுதலைப் போராட்டம் என்பது தேதி குறிப்பிட்டுத் தொடங்குவதல்ல, தேதி குறிப்பிட்டு நிறைவுசெய்யப்படுவதுமல்ல என்றும், தங்களது போராட்டமும் தொடருமென அறிவித்தார். ஆம், கிளிநொச்சி வீழ்ந்தாலும், முல்லைத்தீவு வீழ்ந்தாலும், ஏன், பிரபாகரனுக்குப் பிறகும்கூட அங்குள்ள மக்களின் உரிமைப்போராட்டம் என்பது தொடர்ந்து கொண்டேதான் இருக்குமென்ற உறுதியான நம்பிக்கையுடன் அங்கிருந்து கிளம்பினேன்.

இத்தனையும் சொன்ன நான், மகஇக தோழர்கள் பற்றிக் குறிப்பிடாமல் இருந்தால் சரியாக இருக்காது. இவர்களின் ஆர்ப்பாட்டத்திற்கு முதல்நாள், மாநாடு நடைபெற்றதால் அதிலும் கலந்து கொள்வதற்காக தங்கள் உடுப்புகளடங்கிய கைப்பையோடு வந்திருந்த அனைவர் முகத்திலும் ஏழ்மையை மீறிய இனஉணர்வு வெளிப்பட்டது. மிகவும் கட்டுப்பாட்டோடு, பொதுமக்களுக்கு மட்டுமென்றில்லாமல், காவல்துறையினருக்கும் எந்தவிதத்திலும் சிரமமுமில்லாமல் ஆர்ப்பாட்டத்தை நடத்தினார்கள். குடியரசு தினத்தன்று, இந்திய அரசுக்கெதிரான ஆர்ப்பாட்டம் என்பதால் பரபரப்புடன் வந்திருந்த காவல்துறையினர், தோழர் கோவனின் இனஉணர்வுமிகுந்த, கணீரென்ற பாடல்களுக்கு மெய்மறந்து நின்றதைக் காணமுடிந்தது. தன் தந்தையின் தோள்மீது தூக்கி உட்காரவைக்கப்பட்டிருந்த பையனின் கையில் செங்கொடி, ஆண்களுக்குச் சரிநிகர்சமமாக பெண்களும் இனஉணர்வோடு முன்னின்று நடத்திய ஆர்ப்பாட்ட முழக்கம் அவ்வழியாகப் பேருந்திலும், மற்ற வாகனங்களிலும் கடந்துசென்ற மக்களை வியக்க வைத்தது. அனைவரையும் கைதுசெய்ய வந்திருந்த காவல்துறை உயர்அதிகாரி ஒருவரே, தனது வியப்பினை தோழர்.மருதையனிடம் வெளிப்படுத்திய செய்தியும் என் காதுகளுக்கு எட்டியது.

உரசிய வார்த்தைகள்!

2009-01-23T10:18:00.000-08:00

நன்றாகத்தான் போனது
அறிமுகமான கணங்களில்
அவிழ்த்துவிட்ட வார்த்தைகள் மட்டுமே
விலகி நின்று
ஒன்றையொன்று விசாரித்தவரையில்
வளவளத்த வார்த்தைகள்
இடையிடையே
உரசிக்கொண்டன ரகசியமாய்
இறுதிவரை தேயாமல்
கூடுதிரும்பிய சில
தங்களுக்குள் பேசிக்கொண்டன
"இவன் இன்னாளாகத்தான் இருக்குமென!"

நிராகரிப்பு

2008-12-01T00:05:00.000-08:00

நிராகரிப்பு
முதலில் வலி கொடுக்கும்
முடிவில் வழி கொடுக்கும்!

பிடிக்காததால் மட்டுமல்ல
வேறொன்று
பிடித்தாலும் இருக்கலாம்!

நிராகரிப்பின் காரணம்
நாமாகவும் இருக்கலாம்
தாமாகவும் இருக்கலாம்!

வெள்ளத்தில்
மழை வெறுத்த உள்ளம்
வறண்ட கண்மாயின்
வெடித்த நாக்கினை
மழைநீர் நனைக்கையில்
துள்ளிக் குதிக்கும்!

நிராகரிப்பில்
நிம்மதிகளும் உண்டு
பறவைகளின் நிராகரிப்புத்தான்
காடுகளாகவும்
பறவைகளின் கூடுகளாகவும்!

நிராகரிப்பு
பத்தியமாகும்போது
வைத்தியமாகிறது!

மூங்கில்
நிராகரித்த காற்றுதான்
கீதமாகிறது!

நம் நிலம்கூட
நீரின் நிராகரிப்புத்தான்!
கடலுக்கு
உப்பிட்டு வருவதால்
இன்றுவரை அபகரிக்காமல்!

கற்றுக்கொள்
நிராகரிப்பை நிறையாக்க
நிராகரிக்க!

கரிசல்குளத்தானின் வயக்காடு!

தரை வீழ்ந்த இலை

இலையுதிர்க்காலம்...

உன்னோடு நிமிடங்கள்...

தந்தையாகிறேன்...

லாஸ்ட் பெஞ்ச் குறிப்புகள்!

ஒற்றைக் கொம்புக் குதிரை!

சத்தம்!

உனக்கும் எனக்குமான உரையாடல்!

இனிய பொங்கல் நல்வாழ்த்து!

பட்டுச்சேலை

நீயில்லாத பக்கத்து வீடு!

அவளோடு நான் - கவிதைச் சரம்!

தீபாவளிக் கவிதைகள்

கழைக்கூத்துச் சிறுமி!

வேண்டாம் இன்னொருமுறை!

பேருந்து நிமிடங்களில்...

ஹைக்கூ சரம்!

ஹைக்கூ சரம்!

உனக்காக...

துளித் துளியாய் கவிதைகள்!

சரஸ்வதி பூஜை

பாடுபொருள் படும்பாடு!

காதலுடன்...

காதல் சொன்ன பருவம்!

துளிப்பா கோவை!

ஊருக்கெல்லாம் பெய்த மழையில்என்னை நனைத்தனஎனக்கான மழைத்துளிகள்!----------------------------

இரவு வரும்போதெல்லாம்பீதியை போர்த்திக் கொள்ளும்தூங்காத அசைவுகள்!-------------------------------

ஊனமுற்ற பிச்சைக்காரரை கடக்கையில் ஊனமாகிறேன்பையில் சில்லறையில்லாத போது!--------------------------------

இன்னமும் தூங்காத குழந்தையின் சிணுங்கல்விழித்தபடி நிலவு!-------------------------------

வீட்டு உரிமையாளருக்குத் தெரியாமல்மீன் சமைக்கும்போதுகாவல் காத்தது பூனை!-------------------------------

குழந்தைகள் தூக்காததால் உயிர்ப் பெறாத கொலு பொம்மைகள்! -------------------------------

பறவைகளில்லாத நேரம் வத்தி வைத்துச் செல்கிறதுகாற்று!

கூரை ஓட்டை வழியேஉறங்கும் இடந்தேடி வந்ததுநள்ளிரவின் கனத்த மழை!

சேகரிப்பதற்கு யாருமில்லையென்றாலும்வெண்மை நிறப் பன்னீர்ப் பூக்களைஉதிர்த்துக் கொண்டேயிருக்கிறது!

சாவின் துயரம்

உடைக்காத காதல்!

பள்ளிப்பருவம் - 1

அதே காதுகிழிக்கும் மணியோசைதான்பள்ளி விடும்போது மட்டும்மனதுக்கினிய இசையாக!

பள்ளிப்பருவம் - 2

எத்தனை முறை ஒடித்தும்ஒருபோதும் திருந்தியதில்லைபிரம்புடன் திரியும் மணி வாத்தியார்!

பள்ளிப்பருவம் - 3

பள்ளிப்பருவம் - 4

"ஜனகணமண" அர்த்தம் விளங்கியதில்லைதினமும் கால்கடுக்க ரசிப்பேன்...ரமா, சந்திரா பாடும்போது!

பள்ளிப்பருவம் - 5

மூச்சடக்கி முங்கு நீச்சலடித்தவன்சுவாசத்தைச் சுவைக்கும் மகிழ்ச்சிதான்விளையாட்டுப் பாடவேளை நேரத்தில்!

மரக்கிளையில் சிக்கிய காற்றாடியைவேடிக்கை காட்டி உணவூட்டியதுதாய்ப்பறவை!

செங்கொடி உயரட்டும்!

என்னை நனைத்த மழைத்துளிகள்

சுள்ளென்று அடிக்கும் வெயிலும்இதமாயிருக்கிறதுசோவென்று கொட்டிய மழைக்குப்பின்!

புதிதாக பல்முளைத்த குழந்தையாகஒவ்வொரு விடியலிலும்புன்னகைக்கும் புல்வெளி!

வளையல்கள் கழண்டு விழுவது தெரியாமல்விளையாடியபடிஎனைத் தொடர்ந்தது தூறல்!

எண்ணிலடங்கா வாகனங்கள்கடந்துகொண்டேயிருக்கின்றனஎந்த வண்டும் வரவில்லை;சாலையோரப் பூச்செடிகள்!

மதுப்புட்டிகள்அழகாக அடுக்கிவைக்கப்பட்டுள்ளனஉருண்டு புரண்டபடி சாலையில் குடிகாரன்!

மழைக்காலத்தின் நீர்க்குட்டையில்இறங்கிய கால் பற்றிமேலேறிவந்தன...மூழ்கிக்கிடந்த சேறும் சகதியும்!

வெற்றிலை!

எங்கம்மா...

எத்தனை முறைசில்லரை திருடினாலும்தினமும்சில்லரையோடுதான் தொங்கவிடப்படும்அப்பாவின் சட்டை!

இது ஷாப்பிங் காலம்!

நான் பச்சை விளக்குக்காரி!

என் அவள்...

குழந்தையும் பொம்மைகளும்

வாழ்வின் விபத்து!

குப்பை நகர் காசி!

வறுமை!

ஆலஞ்செடி

புகையும் அடுப்படி!

காமராஜர் என்றொரு அரசியல்வாதி!

ஆறாவது அறிவு!

இலவசமாய்!

அரிதார புருஷர்கள்!

கொஞ்சம் கவிதை!

சோளக்காட்டு பொம்மை!

இயற்கை

சில்லரை

வயக்காடு வாழ்த்துகிறது!

அதிபர்களின் அரசாங்கம்

உறவுகள்

கனவுகள் தொலைப்பவன்!

பிரிக்கப்படாத புத்தகங்கள்

ஊருக்கெல்லாம் பெய்த மழையில்
என்னை நனைத்தன
எனக்கான மழைத்துளிகள்!
----------------------------

இரவு வரும்போதெல்லாம்
பீதியை போர்த்திக் கொள்ளும்
தூங்காத அசைவுகள்!
-------------------------------

ஊனமுற்ற பிச்சைக்காரரை
கடக்கையில் ஊனமாகிறேன்
பையில் சில்லறையில்லாத போது!
--------------------------------

இன்னமும்
தூங்காத குழந்தையின் சிணுங்கல்
விழித்தபடி நிலவு!
-------------------------------

வீட்டு உரிமையாளருக்குத் தெரியாமல்
மீன் சமைக்கும்போது
காவல் காத்தது பூனை!
-------------------------------

குழந்தைகள் தூக்காததால்
உயிர்ப் பெறாத
கொலு பொம்மைகள்!
-------------------------------

பறவைகளில்லாத நேரம்
வத்தி வைத்துச் செல்கிறது
காற்று!

கூரை ஓட்டை வழியே
உறங்கும் இடந்தேடி வந்தது
நள்ளிரவின் கனத்த மழை!

சேகரிப்பதற்கு யாருமில்லையென்றாலும்
வெண்மை நிறப் பன்னீர்ப் பூக்களை
உதிர்த்துக் கொண்டேயிருக்கிறது!

அதே காதுகிழிக்கும் மணியோசைதான்
பள்ளி விடும்போது மட்டும்
மனதுக்கினிய இசையாக!

எத்தனை முறை ஒடித்தும்
ஒருபோதும் திருந்தியதில்லை
பிரம்புடன் திரியும் மணி வாத்தியார்!

"ஜனகணமண" அர்த்தம் விளங்கியதில்லை
தினமும் கால்கடுக்க ரசிப்பேன்...
ரமா, சந்திரா பாடும்போது!

மூச்சடக்கி முங்கு நீச்சலடித்தவன்
சுவாசத்தைச் சுவைக்கும் மகிழ்ச்சிதான்
விளையாட்டுப் பாடவேளை நேரத்தில்!

மரக்கிளையில் சிக்கிய காற்றாடியை
வேடிக்கை காட்டி உணவூட்டியது
தாய்ப்பறவை!

சுள்ளென்று அடிக்கும் வெயிலும்
இதமாயிருக்கிறது
சோவென்று கொட்டிய மழைக்குப்பின்!

புதிதாக பல்முளைத்த குழந்தையாக
ஒவ்வொரு விடியலிலும்
புன்னகைக்கும் புல்வெளி!

வளையல்கள் கழண்டு விழுவது தெரியாமல்
விளையாடியபடி
எனைத் தொடர்ந்தது தூறல்!

எண்ணிலடங்கா வாகனங்கள்
கடந்துகொண்டேயிருக்கின்றன
எந்த வண்டும் வரவில்லை;
சாலையோரப் பூச்செடிகள்!

மதுப்புட்டிகள்
அழகாக அடுக்கிவைக்கப்பட்டுள்ளன
உருண்டு புரண்டபடி சாலையில் குடிகாரன்!

மழைக்காலத்தின் நீர்க்குட்டையில்
இறங்கிய கால் பற்றி
மேலேறிவந்தன...
மூழ்கிக்கிடந்த சேறும் சகதியும்!

எத்தனை முறை
சில்லரை திருடினாலும்
தினமும்
சில்லரையோடுதான் தொங்கவிடப்படும்
அப்பாவின் சட்டை!